الخميس، 19 أبريل 2012

#هل_تعلم؟! .. صرخات عن التحرش



هل تعلم؟! .. صرخات - مش تغريدات - عن التحرش

مهما حاولنا أن نكتب عن التحرش فلن نصف الجرم و لن نشفي غليل ضحاياه. في أعلي صفحتي شعار " كلنا ليلي " رفعته منذ ما يزيد علي عامين، وفي الحقيقية هو مجرد شعار أعلم تماماً أنه لا يداوي جراح ليلي.
لا يصف الوجع إلا الموجوع.
شيرين ثابت .. واحدة من المتوهجات اللاتي لا يجمعك معهن حديثاً عليFaceBook  لكنك تهتم لكتاباتهن، فهي ليست ممن تكتبن عن التصرفات المثالية كفتاة مثالية .. أنما تصر أن تصدمك بكتابة تنبض بالحقيقة .. تصدم حين تقرأ كتابة من لحم و دم .. و اليوم قررت شيرين ثابت أن تصدمنا و زميلاتها بكتابة عن التحرش .. كتابة ليست كالتي تنتظرها .. أنما كتابة عن التحرش يقع أثرها علي المتلقي كما يقع فعل التحرش علي الفتاة.
أعرف أن الكلمة تسبب أزمة للفتيات .. لكن شيرين ثابت و زميلاتها قررن أن يدمين جراحهن عله يصفي, ينظف، فيتطهر .. أو نتطهر نحن!!

كتبت تقول:
ﻗﺮﺭﺕ ﺃﺣﺮّﺽ ﻛﻞ ﺻﺎﺣﺒﺎﺗﻲ ﺍﻧﻨﺎ ﻧﻜﺘﺐ ﺑﻤﻨﺘﻬﻰ ﺍﻟﺼﺮﺍﺣﺔ ﻭﺍﻟﻮﺿﻮﺡ ﻋﻦ ﻳﻮﻣﻴﺎﺕ ﺍﻟﺒﻨﺖ ﻓﻲ ﺷﻮﺍﺭﻉ ﻣﺼﺮ ﻭﻣﻊ ﺍﻟﻤﺘﺤﺮّﺵ ﺍﻟﻤﺼﺮﻱ. ﻗﺮﺭﺕ ﺃﺣﺎﻭﻝ ﺃﻗﺮﻑ ﺍﻟﻨﺎﺱ ﻋﻠﻰ ﺍﻟﻔﻴﺴﺒﻮﻙ ﻭﺗﻮﻳﺘﺮ ﺑﺤﻜﺎﻳﺎﺕ ﻓﻲ ﻏﺎﻳﺔ ﺍﻟﻘﺮﻑ ﻭﺍﻟﺴﻔﺎﻟﺔ، ﻣﺎﻫﻪ ﺇﺣﻨﺎ ﻣﺶ ﻫﺎﻧﺸﻴﻞ ﺍﻟﻬﻢ ﻟﻮﺣﺪﻧﺎ ﺑﺄﻩ. ﺷﻜﺮﺍً ﻟﺴﻌﺔ ﺻﺪﻭﺭﻛﻢ ﻭ ﺣﻔﻈﻬﺎ ﺍﻟﻠﻪ ﻣﻦ ﺍﻻﻳﺎﺩﻱ ﺍﻟﻄﻮﻳﻠﺔ.

#ﻫﻞ_ﺗﻌﻠﻢ ﺍﻥ ﻏﺎﻟﺒﺎ ﺍﻱ ﺭﺍﺟﻞ ﻃﻮﻳﻞ ﻋﺮﻳﺾ ﻳﺸﻮﻑ ﺑﻨﺖ ﺑﺘﺘﻤﺴﻚ ﻣﻦ ﺃﻱ ﻣﻜﺎﻥ ﻓﻲ ﺟﺴﻤﻬﺎ ﺑﻴﺘﻔﺮّﺝ ﻭ ﻣﺎﺑﻴﺤﺎﻭﻟﺶ ﺣﺘﻰ ﻳﻘﻮﻝ ﻛﻠﻤﺔ ﻟﻠﻤُﺘﺤﺮّﺵ؟

#ﻫﻞ_ﺗﻌﻠﻢ ﺍﻥ ﺍﻟﺒﻨﺖ ﻣﻤﻜﻦ ﺟﺪﺍً ﻭﻫﻲ ﻣﺎﺷﻴﻪ ﻓﻲ ﺍﻟﺸﺎﺭﻉ ﺗﺴﻤﻊ ﺍﻱ ﻋﺒﺎﺭﺓ ﻋﻦ ﺍﻱ ﺗﻔﺎﺻﻴﻞ ﻓﻲ ﺟﺴﻤﻬﺎ ﻭ ﺣﺘﻰ ﻋﻦ ﺃﻋﻀﺎﺋﻬﺎ ﺍﻟﺘﻨﺎﺳﻠﻴﺔ؟

#هل_تعلم ان ممكن جداً واحدة (منقبة) تبقى واقفه في اوتوبيس و فجأه يتم التحرش بيها جسدياً و بكل الطرق الممكنة؟ و #هل_تعلم ان ماحدش بيتحرّك غالباً؟


#هل_تعلم انه من الغريب ان البنت تخرج وتروّح بيتها من غير ماتسمع كلمتين تلاتة عن اراء المواطنين في صدرها؟ وبكل الألفاظ الممكنة؟

#هل_تعلم ان لو لبس البنت مش عاجب سيادته بيعتبر التحرّش بيها حق مكتسب له؟ والغريب هو ان الناس تحاول تمنعه؟

#هل_تعلم ان في واحد غبي على تويتر بيسألني دلوقتي انتي واثقة من الكلام ده؟ و عرفتي منين؟

#هل_تعلم ان سواق الميكروباص مرة طلع نص جسمه من الشباك و شتم البنت كل الشتايم الأبيحة هي و أهلها عشان زرارين الشيميز بتاعها مفتوحين؟ ولما اتخانقت معاه شتمني وكان هايضربني و الرجاله اللي في الميكروباص مانطقوش؟

#هل_تعلم ان مرة واحد على سلّم المترو كان نازل جنبي بيقولي أقذر الألفاظ ولما شتمته كان هايضربني و اتلموا الناس يلوموني انا عشان صوتي عالي؟

#هل_تعلم ان في خان الخليلي شباب بيعاكسوا 24 ساعة بمنتهى قلة الادب ولو اتخانقت معاه هايبجّح و يقل ادبه اكتر ؟؟ عن تجربة

#هل_تعلم ان مافيش اي فرق بين قذارة المتحرشين مع المحجبة و قذارة المتحرشين مع الغير محجبة؟ وماينفعش حد يفتي في ده غير بنت جربت الحالتين.

#هل_تعلم ان ممكن جداً كل فترة تقابل واحد في الشارع قرر يفتح بنطلونه ويفرّج البنات على عضوه الذكري بالعافية؟

#هل_تعلم ان مافيش بنت فاتها أي لفظ أبيح في شوارع مصر؟؟؟ كلنا بنسمع كل الكلام اللي ممكن أي حد يتخيله؟؟؟ وبنحمد ربنا انها جت على قد الكلام ومامدّش ايده؟؟؟

#هل_تعلم ان لو بنت مشيت في الفجالة هاتتعاكس بمعدّل كلمة مش محترمة كل 3 ثواني؟ و #هل_تعلم ان حصل مشكلة كبيرة بسبب كده من اسبوعين لإن اصحاب المحلات هرّبوا المتحرش اللي ضرب البنت لما شتمته؟


#هل_تعلم ان في واحد تاني على تويتر بيقولي مدام البنت لابسه محزّق يبقى التحرش عمل ايجابي؟

#هل_تعلم ان بعد عملية التحرّش بتفضل البنت متوترة و اطرافها ساقعة وفاقده القدرة على الكلام لمدة تعتمد على طريقة التحرش؟

#هل_تعلم ان أكتر من نص المُتحرش بهم بيتكسفوا يحكوا لأهلهم من كتر البشاعة؟ يعني لو حد قالك ترضاها لاختك وقلت اختي بتلبس محترم، لا يا بأف اختك بتتعجن بس انت اللي ماتعرفش.

#هل_تعلم ان في انسان على تويتراً تعليقاً على موضوع خان الخليلي بيقولي: يبقى انتي عايزة كده ليه بتروحي هناك وانتي عارفة؟

#هل_تعلم ان اي بنت هاتقف في الشارع مستنية تركب او مستنية حد ، عادي جداً يعدي عليها عربيات تفتحلها الباب و البأف اللي جوة يدعوها للدخول؟ على اعتبار انها اكيد عاهرة الى ان يثبُت العكس؟ خصوصا في شارع خاتم المرسلين هرم




#هل_تعلم ان لما صديق حكالي على جرأة حرامي في سرق الموبايلات في المترو جاتلي هيسترية ضحك؟ باعتباري مُت موتات احسن من دي بكتيييييييير !!! مستغرب من جرأته في سرقة موبايل. مش في سرقة قفشة!

#هل_تعلم ان تلت تربع رجالة تويتر منقسمين لنص شايفني ببالغ خصوصا على التحرش بالمحجبات ونص شايف ان البنت هي اللي غلطانة بسبب لبسها؟ وواحد عايز يوصفلي احساس الراجل لما بيشوف لبس ضيق؟

#هل_تعلم ان رداً على كلامي عن التحرش بستقبل بعض التحرشات على تويتر والفيسبوك حالاً؟

#هل_تعلم اني في ظل تلك الظروف العصيبة كل الذكور اللي قابلتهم في حياتي في اي مكان و في اي ظروف قالولي نفس الجملة؟ : انا عمري ما عاكست بنت

#هل_تعلم ان ممكن الناس تعدّي للمتحرّش الفاظه السافله و كلامه عن أكثر أجزاء جسم البنت خصوصية وتقفيشه كمان بس لو البنت قالتله #احا يبهدلوها؟

#هل_تعلم ان بسبب صديقنا المتحرّش مكن بنات ماتخرجش من بيوتها اساساً و مايمارسوش حياتهم بصورة طبيعية؟

#هل_تعلم ان صديقتي مابتلبسش غير اللون الاسود بسبب التحرش ويوم ماتلوّن بيبقى يوم اسود عليها؟ مأتم إجباري

#هل_تعلم ان البنات ممكن تحكي حكايات التحرش دي للأبد ومش هايخلّصوا؟

#هل_تعلم ان الملايين من الشباب اللي بيتحرّشوا بالبنات دول هم نفس الناس اللي دخلت فيلم شارع الهرم هم هم اللي انتخبوا الحرية والعدالة؟ ملحوظة يعني

#هل_تعلم ان ربنا طلب منك تغض البصر؟ #هل_تعلم ؟ سؤال لمرضى تويتر

#هل_تعلم ان صديقتي اللي معاها اليكتريك في شنطتها سوّاق التاكسي اعجب بيها وقرر يخطفها في عز الضهر ووسط البشر والزحمة و ماسابهاش غير لما ضربته؟

#هل_تعلم ان في حد بيرد على موضوع ربنا قال غض البصر و بيقول، ماهه طلب من البنت برضه الاحتشام قولي الحقيقة كاملة؟ طيب اولاً التحرش بيطول كل انواع الملابس ثانيا وده الأهم، وانت مالك هي مابتسمعش كلام ربنا انت رايح تجيبله حقه يعني؟

#هل_تعلم ان التحرش الجنسي وصل كمان لمرحلة ان في بنات بتتحرش بالولاد؟ الحق يقال يعني.

#هل_تعلم ان في واحد على تويتر رده على موضوع الألفاظ السافلة في الشارع ان البنات كمان على تويتر بأوا بيشتموا براحتهم؟

#هل_تعلم ان لمسة إنسان لجسم فتاة مايعرفهاش بدون إرادتها بقت مسألة وجهة نظر؟

#هل_تعلم ان أول حادثة تحرّش كبيرة حصلتلي ومش هاقدر انساها ابداً كان معايا اتنين صاحباتي وكنّا في رابعة ابتدائي؟

#هل_تعلم اني اتعلمت الشتيمة على ايد المتحرشين؟

#هل_تعلم ان انا نفسي يبقى عندي اليكتريك؟ و اي سلاح ادافع بيه عن نفسي؟


#هل_تعلم ان أي حظيرة حيوانات فعلاً أكثر تحضراً من شوارع مصر المحروسة؟

#هل_تعلم انه راجل عنده 60 سنة ودقنه قد كده و بيفصص جسمها حتة حتة بمنتهى الوقاحة و بعدين يبصلها بقرف ويبص الناحية التانية؟

بطنكوا وجعتكوا؟ معلش، #هل_تعلم ان عادي جداً ان المتحرّش يضرب البنت من ورا في وسط الشارع متخذاً في ذلك تامر حسني قدوة و يضحك و يجري ولا كإنه عمل حاجة؟

#هل_تعلم ان ده اكتر يوم رجالة تويتر قلوا ادبهم عليا فيه؟ فعلاً الحقيقة بتوجع وكل واحد باين عليه جداً هو انهي نوع من البشر

#هل_تعلم ان انا مش ناوية اسكت؟ دوّر انت على حل انا مش عارفة اعمل غير اني ارغي

#هل_تعلم ان جملة التحرير وحش عشان فيه تحرش دي أكتر جملة كوميدية في الدنيا؟؟؟؟

#هل_تعلم اني في مرة من المرات بطرد الرجالة من عربية السيدات و عشان يغيظني نزل من الباب اللي انا واقفه عنده مع ان الباقي مفتوحين لمجرد انه يزنق نفسه فيا وهو نازل و يجري؟

#هل_تعلم ان المعاكسة الرقيقه اللي هي كلمة بسيطة حلوة وخلاص بقت رفاهية دلوقتي وانقرضت اساسا؟ واحدة صاحبتي فرحت جدا عشان واحد قالها شعرك زي موج البحر :)

#هل_تعلم ان رمسيس مكان مرعب ليا لإن اكيد اكيد هاتعرض للمعاكسة والتحرش هناك؟

#هل_تعلم انها مش محروسة ولا اللي فيها آمنين ولا اي حاجة من الأحلام دي من سنين طويلة؟

هو انت كنت فاكر الأمن مستتب؟ طب #هل_تعلم ان مرة واحد راكب موتوسيكل وقف قدامنا زماااان عند المدرسة واحنا بنات في اعدادي وفتح زراير القميص ولقيناه لابس تحته براه وبيضحكلنا ويشاورلنا واتفزعنا؟



#هل_تعلم ان التحرش الجنسي ده بيعتبر اغتصاب علني للبنت؟ عارف اختك اغتصبوها كام مرة؟

#هل_تعلم ان كل مابيعدي جنبي ولد في الشارع ايدي بتتحوّل لوضعية البوكس أوتوماتيك وضربات قلبي بتزيد؟

#هل_تعلم ان مايكل عادل اتصل بيا وقالي انه ماشي في طلعت حرب راحت واحده ندهاله و قعدت تتكلم معاه عالديوان و اسئلة تانية و في الاخر راحت لاعباله في زرار التي شيرت راح قالها لو سمحتي وسابها ومشي؟

#هل_تعلم ان سن المتحرش بيكون 12 سنة فيما فوق؟

#هل_تعلم ان التحرش في الشارع و الجامعة والفيسبوك و تويتر و التليفون و الموبايل؟

#هل_تعلم ان انا ماعنديش حل للمشكلة دي؟ ماحدش يسألني تاني بأه !!! ماهه لو عندي حل ماكنتش قرفتكوا كده

#هل_تعلم ان كلهم في الشارع بقوا بالنسبالي شبه بعض؟

#هل_تعلم ان كونك متحرش وحيوان ده بيفقدني أنا جُزء من إنسانيتي؟؟ انا ممكن أعمل مصيبة بسببك!

#هل_تعلم ان الكلام في الموضوع ده مكانش فكرتي؟ انا قررت كده لما لقيت اتنين من صاحباتي بالصدفة البحتة قدامي عالتايم لاين بيتكلموا عن التحرش وواحدة منهم في حالة انهيار؟

***

طبعا الموضوع لم ينتهي .. لو لسه عاوز تتابع أكتر ممكن تقرأ من خلال الضغط علي الرابط هنا

بس حابب أضيف واحد من أهم التعليقات اللي أتكتب لشيرين تعليقا علي تدويناتها و هو تعليق سامح سمير، واحد من البني أدمين الحقيقيين اللي بيكتبوا كلام من لحم ودم، كتب يقول : #هل_تعلم
إحساس الراجل لما حبيبتة أو أختة أو صديقة أو بنتة تيجي تقوله إن حد إتحرش بيها بيبقي عامل أزاي ، تعرفي إحساس العجز و القهر لما ميبقاش عارف يرد عليها يقولها إيه عشان معندوش أي حاجة ممكن يعملها 




تحديث : أضافت شيرين ثابت تغريداتها في نوت مستقل علي صفحاتها بالرابط هنا







Name of the Product you are reviewing


Reviewed by محمد حويحي
on Jan 6 2012



Rating: 5

الثلاثاء، 3 أبريل 2012

صفقة ترشح الشاطر


طبعا ترشح المهندس خيرت الشاطر لمنصب رئيس الجمهورية سيكون صفقة، فالترشح للمنصب نفسه صفقة. وفي حالة الشاطر فالصفقة صفقات، صفقة للشاطر المرشح، و صفقة الإخوان.

تبرع الإخوان عقب الثورة بالتصريح عن نيتهم عدم الترشح لمنصب رئيس الجمهورية للصالح العام. و أنا لا أجد عيبا أن أن يعدل تيار سياسي قراره، بل أجدها مرونة واجبة تفرضها الحنكة السياسية والمسئولية تبعاً لتغير الظروف.

لكن الإخوان يصنعون الظروف و يلعبون بتلابيب الأمور جيدا. وبين تبرعهم بالتصريح عن نيتهم عدم الترشح لمنصب الرئيس، و بين خوضهم لغمار المنافسة مرت البلاد بظروف كثيرة كان الإخوان هم اللاعب الأساسي فيها بجانب العسكر.

نعم للتعديلات الدستورية، لم تكن بداية قصم ظهر الثورة التي رفعتهم علي المنصات، ربما كانت البداية علي مائدة عمر سليمان التي فاوض من عليها الكتاتني و مرسي في اللقاء الذي يخفي علينا تفاصيله رغم كل التخمينات والتصريحات التي تصاغ حوله، لكن ربما سيأتي يوما نعرف فيه ما كان.

ظل الإخوان طوال أشهر عدة يدافعون عن شرعية نعم للدستور أمام كل مطالب القوي الثورية والتيارات السياسية علي أختلافاتها، لكنهم تغافلوا عن تلك الشرعية إمام أنتهاكات المجلس العسكري الذي نسخ المواد المستفتى عليها و لم يزل الحبر بأصابع المصريين. فرفض المبادئ فوق الدستورية التي صاغها البرادعي و جماعته وصدر عنه للمواجهة حديثي العهد بالسياسة من الدينوقراطيين أو قل أتباع Islamocracy‏ يحمون الهوية الإسلامية، لكنهم أيضا رغم الأتفاق علي المبادئ الحاكمة التي صاغها الأزهر شوهوا سمعتها أمام المجتمع بحجة شرعية الإستفتاء وأحترام رأي الأغلبية، ثم تتوالي الحوادث و يرفض الإخوان الألتحاق بركاب المطالبين بمجلس رئاسي تاره و مرة بمليونيات لا للمحاكم العسكرية و مليونيات رحيل العسكر حتي أنهم الوحيدين الذين أحتفلوا بثورة يناير و يحق لهم طبعا لأنهم وحدهم تحقق لهم وزياده ما كان يحلم به أكثرهم تفائلا وأبعدهم خيالا. حتي حين أتفقوا علي رفض وثيقة السلمي رفضتها التيارات الثورية والقوي جميعا لما فيها من حماية تصب في صالح المجلس العسكري في حين رفضها الدينوقراطيون لأنها تنقص من دورهم في تأسيسية الدستور الذي ظهر لاحقا بمحاولتهم الأستحواذ علي كتابته الدستور باسم الديمقراطية واحترام الأغلبية مرة اخري و هم أنفسهم حين طلب منهم بصيغ مختلفة تشكيل الحكومة تبعاً للأغلبية و شرعية البرلمان المنتخب و تولي البرلمان أشاعوا بين شبابهم عن الفخ الذي يعده لهم كل الرافضين لحكم الإسلام .. و لا حول ولا قوة إلا بالله.

فجأة يلوح في الآفق ضبابا لا يفهم منه، هل هذا حقا بداية خلاف الإخوان والعسكر؟! أم أن شهر العسل لم ينتهي كما صرح المرشد السابق مهدي عاكف؟!. الشواهد تعلن عن ثمة خلاف ربما يكون شبيها بخلاف 1954. لكن التدبر والتفكير في الأمر لا يعبران عن ذلك بأي حال من الأحوال فشباب ضباط الجيش المصري الذين ثاروا أو أنقلبوا علي فساد حاكم أذاقهم مرارة الهزيمة علي أرض فلسطين، ثأروا لدمائهم و أنحازوا لصفوف الحفاة من أبناء وطنهم، و هم ليسوا كضباط أحتفظ بهم مبارك لسنوات متعاقبة في مواقعهم. ثم أن أختلف ضباط يوليو والإخوان علي حق الإخوان في الحكم وسعيهم لأقتناص أكبر قدر من الكراسي في حين أن أخواننا الآن رفضوا كل المطالب والحلول التي سيقت إليهم لينقلبوا علي محلس العسكر تحميهم شرعية الثورة.

الغريب في الأمر و المعروف أنهم قبل مرور أيام علي رفضهم تشكيل حكومة بما يعني دعم مستتر للجنزوري أو أنتظار أستئذان و أمر المجلس العسكري، أمتعونا بمشاهد مضحكة حد البكاء في مسرحية سحب الثقة من الحكومة. فأصبح الأمر حقا ضبابيا مبهما غير مفهوم أو مريح، و أصبح السؤال .. هما الإخوان بيعملوا أيه؟!!

مصر الإخوان هي مقارهم و وطنهم هو كل أرض تدب عليها قدم إخواني و هو وطن عابر للقارات حدوده كما يقول معلمهم البنا " لا إله إلا الله " لكنهم لا يسعون للوطن ذلك من حيث تآتي مصلحته و إنما إلي حيث يوجههم مكتب الإرشاد.

و لأن سوء الظن من حسن الفطن لا آثم - فلا يجوز أن يلدغ عاقل من جحر مرتين - يصبح السؤال الأهم حاليا .. ما الدوافع وراء ترشح خيرت الشاطر؟

هل يأتي الإعلان عن ترشح الشاطر للمساومة علي مكاسب أخري يتفاوض عليها الإخوان في الحجر المغلقة؟

هل ترشح الشاطر لإستكمال مسرحية سحب الثقة بمشهد ربما يكون ماستر سين الفيلم كله لكنه لن يكون الوحيد أو الأخير؟!

هل هدف الإخوان من ترشيح الشاطر تخدير الثائرين علي تأسيسية الدستور بخبطة علي الرأس موجعة؟!

هل ترشح الشاطر يأتي في صفقة لإعطاء الجماعة المزيد من السيطرة مقابل تشتيش أصوات الناخبين لصالح مرشحي العسكري؟!

و لأن قيمة الأبن المدلل خيرت الشاطر و قامته و مكانته بالجماعة أكبر من اللعب به كورقة ضغط أو الزج به في لأداء دور ثانوي في مشاهد البورنو بين الإخوان والعسكر. فالعقل لا يقبل الفروض السابقة. و يبقي السؤال و تبقي المحاولات للفهم

هل يترشح الشاطر القيادي الإخواني للتأكيد علي أن أبو الفتوح - إخواني الهوي والهوية -ليس مرشح الإخوان؟! و هي فرضية تستكمل فرضية أن ربما تم الدفع بأبي الفتوح بعيدا عن الجماعة ليكتسب ثقة العدو قبل الحبيب و هو ما أحتاج كثيرا من الفلفل والبهارات لإثبات الخلاف مما يزيد من تأيدي كارهي الإخوان كناية فيهم و حبا في شخص ابو الفتوح خلقه؟! و هذا الفرض الموغل في سوداوية التآمر يتطلب أن يختفي الشاطر في اللحظة المناسبة تاركا الساحة لابي الفتوح بعد أن لمع أسمه، وهو ما سيتحقق أن صح تصريح المجلس العسكري أن الشاطر خرج بعفو صحي وليس عفو نهائي عن قضايا العرض العسكري و غسيل الأموال. لكن ربما يكون هذه الفرضية التآمرية ضعيفة - ليس لبعدها عن مخططات الإخوان - وإنما لشخص أبو الفتوح ومواقفه طوال عام مضي.

لربما ترشح الشاطر للترشح .. ربما يسعي جمال مبارك الجماعة للفوز بمنصب الرئيس .. وربما يصعب علي الجماعة ترك منصب الرئيس دون أن تستحوذ عليه .. فبعد فوزهم بالبرلمان ورئاسته و تأسيسيه الدستور ورئاستها .. ينقصهم "الدركسيون" ليقودوا البلد

ليصلك الجديد أشترك بالبريد