الأربعاء، 15 فبراير، 2012

ليَّ فيها النيل .. ولها في الروح


السطور التالية منقولة من الصفحة الشخصية لرباب فايد، تخيلت أنها تكتب لنا -أصدقائها وأهلها- عن 23 يوم خارج مصر، لكن لما قرأت لقيتها فضفضة بينها وبين الوطن بعيداً عن التفاصيل التي تحكيها للأصدقاء بين وداع واستقبال ووداع واستقبال إلا أن ما بين السطور فضفضة بين رباب فايد ويبن مصر،فضفضة بلغتها البسيطة في سرد اللي تحسبة مجر تفاصيل تهم الأصدقاء وأحسبها رسالة إلي كل مرشح لرئاسة مصر .. أن اقرأوا كيف يريد شباب مصر لمصر أن تكون.
النهارده قررت اكتب عن رحلتى لدولة الامارات اللى بدات من يوم 17 يناير وانتهت يوم 9 فبراير ... لاول مرة من زمن أسافر خارج بلدي مصر جاتلى فيزة الزيارة، حضرت شنطتى، أخدت أجازة من شغلى، وصلنى بنت خلتى وخالتى وأخويا للمطار، ختمت الباسبور خروج، ركبت الطيارة، شوفت مصر من فوق وقولت لها هتوحشينى يا بلدى ... طول الطريق بدعى ربنا دعوات خاصة بيا ودعوات عامه للوطن .. وصلت مطار دبى ... ابدأ بقى من هنا اتكلم واحكى ..... مطار كبيييييير وزحمه جداااا ولكن منظم جداً ومعاملة محترمة جداً  البداية لقيت طابور طويل عشان ياخد بصمة العين عشان يعرف انت عندك اى مشكله ولا يسمح ليك دخول البلد .. وانا واقفه فى الطابور لاقت واحد موظف اماراتى جاى سالنى زيارة ولا سياحة قولت سياحة مضى على التأشيرة وقالى اطلعى فوق اختمى واعملى البصمة فوق .. وقفت فى طابور متوسط لا طويل ولا قصير وصلت للراجل ختمت وعملت البصمة ورحت على السير جبت الشنط ومشيت ... كل شئ منظم لأقصى درجة ... مطار كبير جدا ولكنه منظم جداااا ... خرجت بره لاقيت اختى وامى فى انتظاري، سلمنا على بعض وروحنا ... دى ليلة الذهاب
وبداءت الخروجات والفسح وجالى حزن على بلدى بصراحة
بلد زى دبى ليس لها حضارة ولا لها ماضى ولكنها اصبحت حاضر ... بلد ليس لديهم اثار .. هل تعلم متحف دبى فى ايه؟؟ ... مجموعة قلل مكسرة وادوات صيد!! ... معقول هى دى حضارتهم السؤال نط فى دماغى ولاقتنى بقول يا عينى عليكى يا بلدى اتظلمتى ... بس بحبك يا مصر برضوا
ابراج ... عمارات ... برج خليفة ... مولات رهيبة ... قرية عالمية ... مهرجان التسوق بدبى ... مهرجان الاضاءة بالشارقة ... مسجد الشيخ زايد بابو ظبى ... بواخر ... شوارع نظيف  ... اسواق مرتبة .... نظام فى كل حاجه ... ولكن كل ده بلا روح ... حقا بلا روح
مصر بكل ما فيها من عيوب ولكن لديها روح .. فيها دفئ فيها إحساس
و اختى بتسوق، كنت بستغرب .. ايه السواقة دى؟!!  كل شئ منظم، مفيش حاجه اسمها اخد يمينى فجاءه، شمالى فجاءة، الاشارات لازم تُحترم، حتى الشرطه بتقف فى الاشاره ... شرطة صارمه مش شرطة بتقبل الرشوة ... ظابط مش هدفه انه يبقى بيه او باشا ... هدفه يطبق القانون
لو رمت ورقة فى الارض تدفع 500 درهم .. لو وقفت فى مكان غير مخصص للركنة تدفع 1000 درهم ... لو كسرت اشارة ... يالهوى هو فى حد يقدر يكسر اشاره ... انا مشفتهاش طول الفتره دى ... اصله هيدفع غرامة وتتاخد عربيته منه كمان لمدة شهر ... المصرى هناك ملتزم جداااا وكانه متربى على النظام والقانون ... عشان بس الناس تقولك: العيب فى الشعب .. لا للاسف العيب فى اللى مش بيطبق القانون ... هناك تعرف يعنى ايه دولة القانون ... انت لو نسيت عربيتك مفتوحه مفيش قلق .. لو نسيت محفظتك فى حته تلاقيها رجعت ليك .. السبب مش الناس لا السبب القانون اللى بيخوف الناس  .. القانون لما بيحكم كل شئ بيمشى صح
الناس اللى فرحانه بمترو الانفاق اللى عمله المخلوع ... احب ابشرك مترو الانفاق هناك تلمحه وكانك فى مطار القاهرة مش مترو انفاق .. نظام .. شرطة .. نظافة ... تهوية جيدة ... من الاخر مكان للاستخدام الأدمى ... للعلم كل ده مش لأهل البلد ده للوافدين .. اهل البلد عددهم قليل جداااا واغنياء جداااا .
لما طلعت برج خليفه وبصيت على البلد من فوق تشوف العربيات ماشيه ازاى متصدقش عينك نظام ما بعده نظام وكانهم فى سباق سيارات ... طبعا برج خليفه ده اعلى برج فى العالم دلوقتى ...
عندهم تقدم فى المعمار رهيب وفظيع ... دبى بلد استطاعت ان تعمل لها حاضر وهى بلا ماضى ... مصر بلد انهت حاضرها رغم ماضيها وحضارتها
وانا هناك فكرت كتير انا ليه معيش فى دبى؟؟ .. العيشة معقولة المصاريف مش غالية .. الغالى السكن والكهرباء ... الاكل والشرب معقولين  بالنسبه للدخل .. مش زى مصر .. دخل قليل، معيشة غالية جدااااا ...  و انا بفكر فى كده سمعت اغنية حمزه نمره تأشيرتى رايح جاى .. وحسيت قد ايه صعب انى اسيب بلدى ... الاغنيه اللينك بتاعه فى اخر النوت لازم تسمعوها ... على فكره كل المصرين المتغربين اكتر ناس بتعانى من ظلم النظام فى مصر لها ... ساب اهله وارضه وناسه عشان يعيش فبلاش حد يقوله انت اصلا مش حاسس بحاجه .. لان صدقنى اللى عايش فى مصر هو اللى مش حاسس بحاجه كفايه انه وسط اهله ... الغربه مرة فعلاً .. المهم ... دبى بلد بتعرف تسحب منك الفلوس ازاى بس بتعرف .. تديك خدمات ازاى .. فبتدفع وانت راضى لانك هتلاقى خدمة عظيمة ... مش زى حرامية بلادى بيدفعونا بدون خدمة ...
دبى احتلال هندى .. اه والله احتلال هندى ... البلد مليانه هنود بشكل بشع جداااا ... واللى يعرف بلاد الهند عامله إزاى يستغرب إن هما قادرين يحافظوا على القانون كده .
اى واحد هناك بيشتغل بيشتغل بضمير ... يعنى مثلا لما تروح محل اكل مش لازم تدى الراجل فلوس تبس يعنى عشان يظبطلك الحاجه ... هو كده كده بيشوف شغله وبضمير ... فى مرة قولت لاختى: هو انا ادى للراجل بتاع الساندوتشات حاجة عشان يملى الحاجة حلو قالت لي: لا طبعا هو بيشوف شغله عايزه تديله انت حرة بس مش عشان يعمل حاجه هو كده كده بيعمل شغله ... هو ده المفهوم هناك ... مش زى هنا تدفع كام تاخد خدمة ايه .. المفهموم اللى النظام ربى الشعب عليه وخلاه بلا ضمير فى الشغل .
طول الوقت وانا هناك بفكر فى مصر وبحزن اكتر على مصر معقول مصر بلد الحضارة تبقى كده ودبى البلد اللى بدون اى حضاره تبقى كده .. و بين كده وكده كتير اوووى ... هما عندهم بترول واحنا عندنا بترول ... الله ايه الفرق بقى ... الفرق ان هما مسرقوش شعبهم واكلوا الشعب .
اليوم هناك ملوش طعم وبيجرى بسرعه اوووى مفهوش بركة تماما والعجيب ان البلد كلها بتقفل الساعه 10 وايام المهرجان الساعه 12 .. صحيح بنت المعز القاهرة حتى الصباح ساهرة .. يا سبحان الله انت هنا تبداء تخرج الساعه 10 هما هناك يقفلوا من الساعه 10 ... صدقونى بلد بلا روح ولا حياة ... مبانى فقط
خلاص بقى وحشتنى بلدى وعايزه ارجع اشوف بتاع البطاطا  اشوف الباعة الجائلين اشوف الشوارع اللى مش منظمة والزبالة اللى فى كل حته .. كل ده كووووم وروح بلدى كوووم تانى ... بحبها مش عارفه عشان بلدى  ولا عشان هى تتحب فعلا ؟ سألت نفسى السؤال ده ولاقيت الرد من واحد فلسطينى لما أتكلمنا عن مصر وقال : يلا شدوا حلكوا عشان مستنينكم فى فلسطين ... تخيل فلسطين مستنيه مصر عشان تخلص من اليهود!! ... يا سبحان الله .. واتكلم عن مصر وان هى بلد فيها روح وجميله رغم انه عمره ما نزل مصر وقال كان نفسى اقولكم اتفضلوا فى فسطين بس صعب جدااا .. لاقتنى بقول فى سرى الحمد لله على نعمة مصر
جاء معاد الرجوع بقى وكالعاده اختى اخرتنى رحت متأخر على الطيارة .. بس لحقتها الحمد لله بس ولا اى حاجه اجراءات سهلة سريعة منظمة ... من فوق وانا فى الطيارة بصيت على دبى وشوفت الجزيرة اللى عملوها على شكل نخلة وشكل الابراج وفضلت طول رحلة السفر ادعى برضوا .. ومر الوقت ولاقتنى فوق مصر ... صحراء  .. بلدى من فوق صحراء ... كل الاراضى دى بتاعة مين؟!! .. الناس مش لاقيه تسكن والاراضى الفاضية دى بتاعة مين؟! والحكومة محوشاها ليه ... اضايقت وقولت فى سرى معقول يا مصر انت من فوق كده زعلت وغيرت .. زعلت ان مصر بلد الحضارة من فوق صحراء و غيرت لان المفروض احنا اللى كنا نبقى احسن دولة فى العالم بقينا من الدول النامية .
محدش يقولى مصر مفهاش خير .. مصر كلها خير .. بترول .. سياحه .. دهب .. رخام ... زراعه
دبى بترول ..تسوق .. مبانى وابراج عاليه فقط
وصلت مطار القاهرة .. من على سلم الطيارة يفط مرفوعه بقى باسماء ناس حركات بقى ووسايط ... طبعا هناك مفيش الكلام ده كل الناس واحد قانون بقى
واللى لازق فيك حمد لله على السلامه حمد لله على السلامه وهو اصلاً مش بيعمل ليك حاجه بس اهو بقى انت جاى من دولة الخليج يعنى معاك فلوس ... اه هو كده المفهوم .. انا مش بلوم الشخص ده ماهو لو مرتبه مكفيه مكنش عمل كده ولو فى قانون بيحكموا مكنش عمل كده برضوا ... المهم خلصت كل ده وخرجت محدش قالى شنطتك فيها ايه!! .. يلا هيصه بقى ده لو اى حد مهرب اى حاجه مكنش اتعرف ... من الاخر بتوع الجمارك مش شايفين شغلهم الناس خارجه محدش بيبص على شنطته لولا ان الواحد بيتفرم فى مطار دبى كان زمان كل الناس جايه مهربه بلاوى قد كده ... تخرج بقى للزحمة اول ما خرجت وشميت هواء مصر قولت الحمد لله وحشتينى يابلدى بكل ما فيكى .. كان أخويا مستنيني .. شاورنا لتاكسى .. طبعا وسواق تاكسى بدون عداد .. بيقولك فى المطار محدش يشغل عداد .. بالمقاولة .. حرامى يعنى .. مش بلومه برضوا ماهو مفيش قانون يحكمه .. مش هقارن بين التاكسى هنا وهناك لان مفيش وجه مقارنة تماماااا ... المهم رجعت للزحمة والعشوائية فى السواقة وعدم النظام وعدم احترام القانون .. بس بحب بلدى وفرحانة اكتر مما كنت هناك ... اه هنا احسن بكتير ... ماهو انا مش هسيب بلدى غير لما تبقى احسن بلد فى الدنيا .. وهتبقى .. انا عارفه انها هتبقى ان شاء الله .
بيقولوا للسفرسبع فوايد .. انا كان عندى سبع فوايد فعلاً
1-  عرفت غلاوة اشخاص عندى وانى مقدرش ابعد عنهم فعلا .. هما بقى عارفين نفسهم
2-   عرفت انى بحب بلدى وانى مقدرش اعيش بعيد عنها
3-  عرفت واتأكدت ان المصرى لو فى قانون هيحكمه هيمشى صح ومليون صح
4-  عرفت ان بلدى اتسرقت واتنهبت واتظلمت بشعبها
5-  اتاكدت ان مصر ام  الدنيا بروحها وناسها الطيبين
6-  شوفت يعنى ايه شرطه بتحمى وتحفظ
7-  اهم نقطه القانون ثم القانون ثم القانون .. عرفت فعلا يعنى ايه دولة قانون

عارفين انا مكنش بيصبرنى هناك غير حاجتين .. حاجه مش هقولها بقى ومحدش يسالنى هى ايه .. والحاجه التانيه انى كنت عارفه انى راجعه مصر بسرعه مش هعيش هناك .
قررت انى هعمل المستحيل عشان بلدى تبقى احسن .. يقولوا بقى اللى يقوله .. بنخرب البلد، بنوقع الاقتصاد الوهمى، اللى الناس تصدقه .. يقولوا اللى يقوله .. انا ماليش دعوه انا عايزه مصر تبقى احسن من دبى .. حقى احلم وحقى انى احقق حلمى ...
فى النهايه كلمتين من قلب موجوع على بلده .. اتولدت .. وكبرت .. وحلمت .. فى مصر
بس للاسف مقدرتش احقق حلمى ولسه مش قادرة احققه بسبب اللى سرق مصر ومش هقدر اسكت لانه سرق مصر وسرق عمرى معاها ... ساعات كتير بظلم مصر واقولها انت ظلمتينى وارجع اقول مش هى اللى ظلمتنى هى كمان اتظلمت من اللى سرقها ونهب خيرها لنفسه وساب شعبها جعان .. عريان .. بطالة .. فقر .. عشوائيات .. جهل ... الخ .. حاجه توجع وتألم
واخيراً ... ظلمتونا وظلمتوا مصر ... حسبنا الله ونعم الوكيل .. حسبنا الله ونعم الوكيل
حمد لله على سلامتى 





حمد لله علي السلامة يا رباب
ربنا يحقق لك أمنيتك
ونعيش في مصر التي نتمناها
ونشوف القانون علي الصغير والكبير .. مش قانون الغاب

هناك تعليقان (2):

  1. يااااه ان كتبت النوت دى بعد مرور سنه على ثورة يناير .. احلامى وطموحاتى كانت عاليه نفسي اشوف مصر اللى بحلم بيها فعلا

    ردحذف
    الردود
    1. ان شاء الله نضوف مصر اللي بنحلم بها و نعيش فيها و تكون في مقدمة البلاد

      حذف

ليصلك الجديد أشترك بالبريد