الأربعاء، 14 أبريل، 2010

مجانيه التعليم

ولامؤخذه أنها مجانيه التعليم .. !!

أتعودت كل سنه أن أبويا يديني الفلوس وأروح أدفع المصاريف لآختي في كليتها في جامعه القاهره.

الحديث أنهارده مش عن شكوتي من أني بروح أدفع المصاريف ولا اني مثلا قلبي بيتقبض من القصر العيني - مش عارف ليه!!- ولا عن شكوتي من أن ابويا مدلع أختي علي حسابي .. ماتروح هي تدفعهم .. الله

الحديث عن مجانيه التعليم .. أيوووون سعادتك .. أنها مجانيه التعليم .. أبويا لانه رجل تربوي يعني تربيه وتعليم يعني حكومه واللي تشوفه الحكومه يبقي هو الصح واخر البوست هايقولي اجري ياض احذف الكلام اللي كاتبه ده 

اه بيقولي ياض .. ماعلينا .. ابويا وليه عليا حق التربيه 

المهم .. ابويا شايف ان الامر عادي .. بس انا شايف انها فارقه كتير جدا .. انتوا شايفين ايه؟؟

بدفع مصايف لاختي حوالي 250 جنيه أبويا شايف ان ده كده قمه مجانيه التعليم .. بس اللي عاوز الفت نظره ليه وكل مره اتخانق معاه فيه .. ان اللي بيدخل خزانه الدوله منهم 45 جنيه يعني اما السيد الاستاذ الدكتور والسيد الاستاذ الدكتور التاني والسيد بقي الاستاذ الدكتور بتاعهم كلهم والسيد ....... اطال الله عمره يكملونا عن مجانيه التعليم 
بيبقي كلامهم صاااااااااااااااااااادق  اه والنعمه

ماهو اللي سعادتك وسعادتي بندفعه في التعليم الحكومي المجاني واللي بيتحصل عشان يدخل خزانه الدوله ملااااااليييييييييم فهي مجانيه حقيقيه
انما بس معايا الوصل الاحمر ابو شعار وختم وزاره الماليه بتبقي قيمته كاااااااااااام 45 جنيه طيب امال باااااااااااااااقي المبلغ بيبقي ايه تبرعات سعادتك

ولان ابويا شايف ان الموضوع مش فارق .. وانا شايف ان الموضوع فارق جدا فكنت بقعد كل مره اكلم في نفسي وخلاص لحد ما حصل الي حصل 

رحت دفعت مصاريف الماجستير انهارده
:(

دفعت كااااااااااااااام 1566 جنيه مصري لا غير
ودا متوسط المصاريف اللي بتدفع في الجامعات المصريه للتسجيل لدرجه الماجستير

ياجماعه الامر مش في الالف وخمسميت جنيه لاااا انا راجل فنجري والالف وخمسميه دول بدفعهم في الفطار ( لو حسبت الي هافطره من دلوقتي لمده سنيتن تلاته قول عشره يعني) .. المشكله مش ان المبلغ ارتفع فجأه من 600 في جامعتي الي 1556 ولا من 800 الي 2300 في جامعات تانيه 

المشكله ان مصاريف الفعليه واللي بتتحصل في خزانه الدوله واللي مكتوبه في الوصل الاحمر ابو ختم وزراه الماليه قيمتها 161 جنيه 

اما باقي المبلغ 
فهو تبرعااااااااااااااااااااااااات

ما انا فنجري بقي

هناك تعليقان (2):

  1. يعنى الباقى دا تبرعات اجبارية ولا ايه؟؟؟
    طب كويس ادينا بنعمل خير ونتبرع بظهر الغيب واهو كله فى الميزان ههههه

    ردحذف
  2. ماشى يا عم الفنجرى

    ردحذف

ليصلك الجديد أشترك بالبريد