الأربعاء، 23 ديسمبر 2009

مش بـرد 1


الشارع ساكن .. يليق بهذه الساعة المتأخرة من الليل, يسلكان طريقهما إلي المنزل سيرا علي الأقدام, يفلت يدها من يده ويحوطها بذراعه.

- بس بتعمل إيه إحنا في الشارع.

- يعني أنتِ شايفه الخلق راحه جايه, الجو برد عليك, تاخدي الجاكيت.

- برد إيه! .. دا الشارع أدفا من البيت .. ألا هو بصحيح ليه كده؟

- ليه كده إيه؟

- ليه الشوارع بقت أدفا من البيوت؟!

يضحك بصوت عالي علي أثرها نبحت الكلاب فانكمشت تختبئ فيه.

- فيه إيه ؟ ها تصحي الناس .. بتضحك علي ايه؟!

- علي سؤالك؟

- وماله سؤالي؟

- انت بتحسي بالدفا في الشوارع اكتر من البيت؟

- كل الناس بقت ملاحظه الموضوع ده .. انت مش ملاحظه ولا ايه؟

- لا انا بحبك

"تضحك" .. اه وحراره حبي مشعلله في قلبك .. لا بتكلم بجد .. الكل بقي ملاحظ الحكايه دي ..

- لانهم مش بيحبوا بعض

- يعني هو انا مش بحبك؟ ماتقوووول

- انت اللي قلتي مش انا

تقف في منتصف الطريق وتواجهه : قلت ايه وانت قلت ايه .. انت فيه ايه انا مش فاهمه حاجه.

يجذبها ويحاوطها بذراعه مره اخري ليستكمل الطريق, فترفع يده عنها

- لا بجد فيه ايه انا مش فاهمه حاجه .. انت تقصد ايه؟

- في ايه؟

- في اللي انت قلته

- انا ماقلتش حاجه .. انت اللي قلتي

- لا انت بتقول عشان مابيحبوش بعض .. وانا بقولك اني بحس بالبرد في البيت اكتر من الشارع .. معناته ايه الكلام ده

- طيب نكمل طريقنا طيب ونهدي ؟

تسير بمحاذاته

- وانت شايفني اتعصبت عشان اهدي .. انا بس مش فاهمه كلامك

- انت بتقولي الناس بتقول ان الشوارع ادفي من البيوت .. تفتكري دا ليه؟

- ليه؟

- لا انا بسألك؟ .. عمليا يعني يبقي ليه الكلام ده؟

- وانا اعرف منين؟ .. يمكن ليها حاجه علميه

- يمكن

- هو ايه ده .. ما تقول اللي عاوز تقوله؟

- انا مش عاوز اقول حاجه

في عصبيه .. طيب يلا نروح احسن انا بردت

يضحك فيثير عصبيتها

- بتضحك علي ايه تاني

- اصلك بردتي وانت في الشارع .. امال لما نروح البيت هاتعملي ايه.

- انت عاوز ايه بالظبط

- يضمها اليه ويقبل جبينها

تدفعه عنها وتنهره

- احنا في الشارع احترم نفسك

- احترم نفسي!! .. " يسير دون كلام "

بعد فتره من السير

- هو ايه اللي حصل .. انا ماقلتش حاجه عشان كل ده يحصل .. انت اللي أضايقت

- انا!

تدفن نفسها تحت ابطه : حقك عليا ..

- بقيتي ادفى دلوقتي؟

- بس ياقليل الادب "تضحك"

"يضحك" : انا بتكلم بجد والله مش اقصد اللي في دماغك

- وانا في دماغي ايه

- مش انت بتقولي قليل الادب .. يبقي انت في دماغك ايه؟

- تضربه علي ظهره في دلال و يضحكان

- لا بسالك بجد .. حاسه بالدفا دلوقتي

- أزاي

- افهمي بقي .. مش كنتي بردتي من خمس دقايق واحنا بنتكلم .. دلوقتي حاسه بالدفا وانت هاتقطعيلي الجاكيت كده

- رخم

- هههههههههه .. عارفه البيوت بقت ابرد من الشوارع ليه؟

- ليه؟

- عشان البيوت مابقاش فيها دفا


يحتضنها اكثر ويكمل المسير متيقنا انها تفكر في معني كلامه دون جدوى






=1=


هناك 5 تعليقات:

  1. هي ليه عصبيه وعبيطه ومش فاهمه حاجه كده ؟؟؟
    ضايقتني قوي
    مش عارفه تعيش لحظه جميله وحاطه نفسها في مواجهه حاده !!!
    بالراحه يابنتي مستعجله علي الخناق ليه !!!!
    بس صحيح !!!
    للاسف الشديد البيوت مابقاش فيها دفا !!!!

    ردحذف
  2. تجسيد ومحاكاة جذابة واكتر من رائعة
    للحظة عبقرية واحساس صافي ونقي
    كأنها أحاسيس الدنيا اول ما اتخلقت
    بس المشكلة بقي لما تكون حاسس بالبرد في البيت وحتي ف الشارع
    ومكان الدفا الوحيد عارف ان عمرك ما هتوصله

    ردحذف
  3. مها العباسى12 مارس 2010 9:16 م

    ساعات بيكون البرد فى عز الحر البرد والدفا الحسى فى لحظه فى ضمه دافيه بتاخد لجوا حضن بيكون أماااااااااااااان
    بس الاخت مستعجله على ايه ماتاخد اللحظه وتعيشها وتسيب بكرة لبكرة

    ردحذف

ليصلك الجديد أشترك بالبريد