الجمعة، 13 نوفمبر، 2009

مسجل صـبر!!

وَبَشِّرِ الصَّابِرِينَ

 

من وقائع محضر وهمي "جايز يحصل" .. !

 

رقم القضية : الأولي من نوعها / جنايات

القضية : جنحه قتل

 

حيث تقدم المتهم ببلاغ رسمي يتهمه بقتل حلمه بالصبر.

وبسؤاله ..

 

س: أسمك؟

لم يرد

 

س: سنك؟

لم يرد

 

س: محل سكنك؟

لم يرد

 

ما أنت ها تتكلم وتفهمني .. الإنكار بعد بلاغك مش ها يفيد بحاجه .. كل الأدلة المثبتة بتدينك والشهود ما لهمش حصر .. أنطق .. قتلت حلمك ليه؟؟

......

ها واجهك بالشهود

......

 

نادي يابني علي الشاهد الأول ..

 

-1-

يأبني أبني برئ والله يقتل إيه بس؟! ..

يا حاج أنت مش قلت أبنك معروف بالصبر ؟

أيوه!

يبقي أبنك سوابق

أزاي بس؟!

أبنك قتل حلمه بالصبر .. وأنت بتثبت أن أبنك بتاع صبر .. يعني مدرب علي استخدام أداه الجريمة

مش فاهم حاجه

طيب أصبر بره علي ما ناخد أقوال باقي الشهود

 

-2-

ما تخافيش .. لو اعترفتي ها تكوني شاهده ملك ومش ها تتحاكمي بتهمه الاشتراك معاه في الصبر.

أعترف بأيه يابيه؟!

باللي تعرفيه .. أنت مش بتقولي أنكم مخطوبين بقالكم سنين

هي مش خطوبه رسمي .. بس كل الناس عارفه إننا لبعض

ها؟

شوف سعادتك من صغرنا وإحنا يعني كداهوه يعني .. فاهمني؟؟ .. أقصد يعني إننا إيه حب يعني وكلام من ده .. المهم .. كبرنا وأحنا مع بعض والكل عارف قصتنا وأهالينا موافقين ومباركين خلص دراسته وخلصت دراستي من يجي تمن يمكن عشر قول اتناشر سنه .. أشتغل وأشتغلت وأدينا بنكافح وان شاء الله هانتجوز قريب :)

نعم ؟؟ .. بيلعب بيكي عمرك كله وأنتِ موافقه واهلك مباركين والناس عارفين .. وعلي إيه طيب صابرين؟؟

علي حالنا يابيه .. ما بأيدنا غير الصبر

يعني أنت بتعترفي بأنكم صابرين .. ماتخافيش اعترفي وها تطلعي برائه

طيب وهي فيها ايه .. اه صابرين وليوم الدين .. هاخاف من ايه يابيه

 

-3-

شوف ياباشا أنا طول عمري والواد ده عارف إن أخرته مش حلوه .. أهو صديق عمري من قبل ما نعتب الدنيا .. وأنا أكتر واحد يعرفه .. الواد ده ياباشا صبور وصبره في الدنيا مش قليل اه والله ..

وأنت ما نصحتوش في يوم يعدل عن سكته دي

ياباشا بقولك صاحبي .. لازم أصبر عليه ..

 

-4-

سعادتك أنا ماليش في المواضيع دي .. أنا برئ سعادتك .. أه أنا اعرفه من أيام ما كنت مسئول عن تدريبه اول ما جاه مستجد في الإدارة موظف .. ما كانش يبان عليه خالص يابيه انه خطر .. كان ذكي ونشيط ومحبوب ومؤمن .. ولا إيه مشورتك؟

يعني أنت بتنفي عنه الصبر

أنفي إيه وأثبت إيه بس سعادتك .. أنا ما قلتش حاجه ولا اقدر أقول بعد مشورتك .. هو أه كان ذكي ونشيط بس كان صبور أه ساعات كان يبان عليه الصبر .. من وهو مستجد كان صبور جدا في شغله عمره ما أخر مصلحه حد كان يصبر علي نفسه لحد ما مصالح الناس ما تخلص .. حلو؟

 

-5-

أحنا في الجامعات حاطين نظام عشان نتغلب علي أمثاله لو تخطوا سنين معنية قبل ما ينجزوا دراستهم بيتشطب اساميهم من سجلات الباحثين ولا يحق لهم استكمال دراستهم داخل الجامعة .. صحيح أنا اللي دورت عليه وجبته عشان يكون واحد من الباحثين اللي بشرف علي أبحاثهم لأني مقتنع تماما بذكائه ونشاطه وتفوقه وذاد اهتمامي به بعد ما تابعته وأثبت لي أن طريقه تفكيره مختلقه ومتقدمه  .. إلا أني أنا اللي سعيت لتجميد بحثه فور علمي بالموضوع

تجمده؟! .. ومالغيتوش ليه زى اللائحة ما بتقولي؟؟

لأننا في حاجه للي زيه .. ولازم نصبر عليهم !

 

***

 

إيه رأيك في اللي سمعته .. أظن القضية مستوفيه .. بس أحب أسمعك بقي .. قتلت حلمك ليه؟؟

ماقتلوش .. الدنيا دي ترانزيت بنتوجد فيها عشان نصل للي بعدها وكل واحد علي قد ما يعمل فيها يصل للي بعدها مرتاح .. أنا كان ليا حلمي اللي بسعي أحققه .. أمال ها ضيع الوقت في إيه وأنا مستني دوري .. أذنبت إني حلمت أني حبيت

وقتلته ليه طيب؟

مات بالصبر ما قتلتوش .. الأكاده أني طوله بالي غلبت حلمي .. كنت فاكر أن طوله البال تبلغ الأمل .. أتاري الأمل نفسه قصير

يعني أنت بتعترف أن حلمك مات بفعل الصبر

اه

وبتعترف انك كنت متعمد تصبر عشان فاكر ان طوله البال تبلغ الامل

اه

يبقي أنت صبرت علي حلمك لحد ما مات جواك

اه

يبقي أنت اللي قتلت حلمك .. يجدد حبسه احتياطيا خمسه عشر يوما علي ذمه القضية لعرضه علي المحكمة

خده ياشاويش

ياخدني فين ياباشا ومحكمه ايه وخمسه عشر يوم أيه .. ما تحولني دلوقتي .. ولا اقولكش .. ما تحكم انت عليا أبوس ايدك وتخلصني

 

ما تصبر يابني علي دورك

 

 

هناك 3 تعليقات:

  1. جميله
    لا
    تحفه
    لا
    رهيبه
    لا
    مش ممكن

    ردحذف
  2. كتك الارف

    ردحذف
  3. الا هو صحيح مين اللي بيقتل اسرع الصبر ولا فقدان الامل ؟!!!
    دماغك دي حرام يتصبر عليها !
    مش لاقية كلام
    كتك الارف فعلا

    ردحذف

ليصلك الجديد أشترك بالبريد