الجمعة، 20 فبراير 2009

أضغاث أحلام


أسكن الليل انتظر ان ينفرج نهاراً أت بأبتسامتك..

 فلا ياتي  إلا بمزيد من الأنتظار.

*****

أهي معي؟ لا أصدق!! اخشاك يا زمن..

أخيرا معايا اهي .. ايدها في ايدي .. بالأماره هي اللي مضموه جنب قلبي ..

 بتدق ليه يا واد؟! .. ماتفضحناش .. أحسن تفتكر دقاتك ضعف .. دا انت بمب اياكش غير اللهفه هي اللي تعبتك .. بس أهو خلاص بقت معاك يلا ناخده ونجري نلف ..

 طب علي فين؟! ..

علي فين!! .. علي كل حته .. نلف كل شارع مشيته في يوم لوحدي من غيرها .. افرحه بعد ما شكيتله وحدتي .. نلف ندور علي حبه هوا خرجوا في لحظه ضيق .. نفخناهم نخرج بيهم شويه من الآلم بينا يلا نلاقيهم نصالحهم .. والا تكونش هاتطمع في الفرحه لوحدك؟!..

 

أمسكت يدها .. قبضت عليها براحتي وضمتها الي قلبي يضمهما .. وأطلقت لساقيا العنان نسابق الزمن !! .. فوجدتهما لا يلامسان الارض .. صرت اطير!! .. "طيرني حبك في العلالي .. كنت عاقل ايه يا ترا اللي جرالي ؟" .. ضحكت فضحكت .. أسمع صوت ضحكاتنا في عيون الماره حولنا .. اري الفرحه في استغرابهم, مقتهم, في نظرات التمني في عيونهم .. لعلهم يتمنون لنا فرحه كالتي وهبها لهم حبنا او لعلهم يتمنون التحليق عاليا مثلا.

 

شدني هذا الوجه الصارم الواقف في الظلام هناك .. ينظر الي ثم يتقدم .. كلما ازدادت خطواته تقدما .. ازدادت الفه وجهه .. أنني أعرفه .. نعم .. أنه هو .. لماذا اتي مدرس اللغ العربيه بمدرستي الثانويه في هذا التوقيت .. اعرف انني لم انهي موضوع التعبير ولهذا اخشي الدرجه .. جلست الي المقعد المعد لامتحاني فقدم لي الورقه .. وحين بدات في الاجابه انتهي الوقت .. فاخذ الورقه من أمامي .. ولم اجده وقفت وجريت ابحث عنه .. لعله صعد هذا الرصيف العالي .. اتجه نحو الرصيف فيعلو فقفزت لتفلت قدمي واسقط ..

 

نهضت .. ابحث عنها .. اين هي ؟؟ .. يدي المضمومه الي قلبي فارغه!! .. لا اراها في هذا الظلام .. يتسارع خفقان القلب يسابق انفاسي .. العرق يتصبب بشده ..

 

تلمست ما حولي .. فأدركت الأمر .. أستعذت بالله من الشيطان الرجيم .. وعدت الي النوم ....


 

هناك 9 تعليقات:

  1. ربك لما يريد احلامنا هتحقق وكلامنا هيتصدق والغايب هيعود
    ربك لما يريد قلب العاصى يسلم وعيونا هتتكلم ولا شىء يبقى بعيد
    ربك لما يريد الصعب بيتهون والحزن بيتلون طول ما الايد فى الايد
    ربك لما يريد هلاقيك بتقربللى تفتح حضنك قبلى ولا فيه بينا حدود

    حب لآخر حتة فى قلبك دوب دوب
    ما تخبيش شوقك ولا حبك دوب دوب
    سيب احساسك يخدك ليا اهجر ناسك واسكن فيا
    بكرة ده لسة حكاية بعيدة لسة فى علم الغيب

    حب كأنك حلم معدى عيش عيش
    ما تخليش ولا ثانية تعدى عيش عيش
    خد من حضنك اروى حنينك
    واقسم حزنك بينى وبينك
    وارضى بكل اللى بيتقسم ده المكتوب مكتوب

    ردحذف
  2. قبل ما تحلم فوق .. احلم وانت فايق
    قبل ما تطلع فوق .. انزل للحقايق

    عمنا منير كان قال كدة :)

    حلم جميل احلى حاجة فيه الأسلوب :)

    تحياتى :)

    ردحذف
  3. بوست حلو اوي .. ووصف الحلم والاسلوب جميل جدا ..
    ومادام اختفت في الاخر يبقى تحمد ربنا انه كان حلم .. وان شاء الله في الحقيقة بعيدا عن الحلم تيجي وماتختفيش ابدااااا ابدا ..
    وزي ما ميهو قالت ربك لما يريد ..

    أسكن الليل انتظر ان ينفرج نهاراً أت بأبتسامتك..
    فلا ياتي إلا بمزيد من الأنتظار.
    والجملة دي حلوة اوي اوي .. عجبتني جدا اوي خالص ..

    وعايزة اقولك كمان ان الاستايل بتاع البلوج حلو اوي وعاجبني مووت ..
    :)

    ردحذف
  4. عجبنى المزج بين الفصحى والعامية

    ردحذف
  5. حلو هذا اللينك مابين الحلم الأول او الحلم الافتتاحى والحلم الثانى او حلم الخلفية او قل الرقيب ذو الوجه الصارم الذى لا يدعنا نحلم اويترك لنا الوقت وحين نحاول القفز يعلو لنسقط.. ربط أكثر من رائع.. وعليك ان تحلم وتكتب وتطير وليسقط كل الرقباء.
    من ثقافة وابداع

    ردحذف
  6. ولله من رأيي كلها احلام
    بس فين الحقيقة ؟؟
    بوست هايل ومدونة هايلة
    تقبل مرورى
    إسلام ديو

    ردحذف
  7. عجبتنى المدونة وباذن الله هاكرر الزيارة ....ربنا يوفقك


    تحياتى

    ردحذف
  8. مدونتك جميله

    غامضه وغريبه

    وتدوينتك تحمل الكثير من خلجات النفس

    تقبل مروري

    ردحذف
  9. هو فى حد يحلم الحلم الجميل ده ويصحى من النوم انا لو منك كنت نمت تانى علشان اكمل الحلم اشوف نهايته ايه يمكن يكون مأذون وكوشه وفرح هههههههه
    تحياتى

    ردحذف

ليصلك الجديد أشترك بالبريد