الجمعة، 20 فبراير، 2009

أضغاث أحلام


أسكن الليل انتظر ان ينفرج نهاراً أت بأبتسامتك..

 فلا ياتي  إلا بمزيد من الأنتظار.

*****

أهي معي؟ لا أصدق!! اخشاك يا زمن..

أخيرا معايا اهي .. ايدها في ايدي .. بالأماره هي اللي مضموه جنب قلبي ..

 بتدق ليه يا واد؟! .. ماتفضحناش .. أحسن تفتكر دقاتك ضعف .. دا انت بمب اياكش غير اللهفه هي اللي تعبتك .. بس أهو خلاص بقت معاك يلا ناخده ونجري نلف ..

 طب علي فين؟! ..

علي فين!! .. علي كل حته .. نلف كل شارع مشيته في يوم لوحدي من غيرها .. افرحه بعد ما شكيتله وحدتي .. نلف ندور علي حبه هوا خرجوا في لحظه ضيق .. نفخناهم نخرج بيهم شويه من الآلم بينا يلا نلاقيهم نصالحهم .. والا تكونش هاتطمع في الفرحه لوحدك؟!..

 

أمسكت يدها .. قبضت عليها براحتي وضمتها الي قلبي يضمهما .. وأطلقت لساقيا العنان نسابق الزمن !! .. فوجدتهما لا يلامسان الارض .. صرت اطير!! .. "طيرني حبك في العلالي .. كنت عاقل ايه يا ترا اللي جرالي ؟" .. ضحكت فضحكت .. أسمع صوت ضحكاتنا في عيون الماره حولنا .. اري الفرحه في استغرابهم, مقتهم, في نظرات التمني في عيونهم .. لعلهم يتمنون لنا فرحه كالتي وهبها لهم حبنا او لعلهم يتمنون التحليق عاليا مثلا.

 

شدني هذا الوجه الصارم الواقف في الظلام هناك .. ينظر الي ثم يتقدم .. كلما ازدادت خطواته تقدما .. ازدادت الفه وجهه .. أنني أعرفه .. نعم .. أنه هو .. لماذا اتي مدرس اللغ العربيه بمدرستي الثانويه في هذا التوقيت .. اعرف انني لم انهي موضوع التعبير ولهذا اخشي الدرجه .. جلست الي المقعد المعد لامتحاني فقدم لي الورقه .. وحين بدات في الاجابه انتهي الوقت .. فاخذ الورقه من أمامي .. ولم اجده وقفت وجريت ابحث عنه .. لعله صعد هذا الرصيف العالي .. اتجه نحو الرصيف فيعلو فقفزت لتفلت قدمي واسقط ..

 

نهضت .. ابحث عنها .. اين هي ؟؟ .. يدي المضمومه الي قلبي فارغه!! .. لا اراها في هذا الظلام .. يتسارع خفقان القلب يسابق انفاسي .. العرق يتصبب بشده ..

 

تلمست ما حولي .. فأدركت الأمر .. أستعذت بالله من الشيطان الرجيم .. وعدت الي النوم ....


 

السبت، 14 فبراير، 2009

حوار ليله الفلانتين

 

هي : أنت حلمت بيا قبل كده؟؟

أنا : مرتين.

هي : شفتني أزاي؟

أنا : نجم عالي في السما......

هي : ماشي .. وبعدين؟

أنا : وبعدين ايه ؟! هو كده انا شفتك مرتين وكنتي نجم عالي في السما.

هي : هو ايه ده يعني ما كناش بنعمل حاجه تاني ؟؟ .. ما عملناش قله ادب؟؟

انا : يابت بس عيب اختشي .. 

هي : يالهوي .. يعني هو لاحقيقه ولا حلم حتي .. دا حرام عليك بجد .. يا واد انت بتتكسف في الحلم كمان .. انطق ابوس ايدك.

أنا : في المرتين شفتك نجم عالي .. سمارك كان الشئ الوحيد المنور في ظلام سما واسعه بعيده .. بعيده لدرجه اني مش قارد ابصلك .. كنت حاسس بالوجع في الحلم .. وجع زي اللي بحسه في الحقيقه لانك بعيده جدا مش قادر اصلك .. فما بيبقاش قدامي غير اني اقعد اختلق الحكايات بيني وبينك اتخيلك بتكلميني واكلمك تضحكي وافرح لضحكتك وافتح دراعاتي اضمك لما تنامي علي كتفي اشم روح الدنيا فيكي .. 

هي : .......

أنا : الدنيا عمري كله اخرت فيه الفرحه ليكي .. عمري ما فرحت الا وياكي ..رغم عمري ما كنت وياكي!! .. لحظه الحلم اللي معاكي بتكون حقيقه بالنسبه ليا لاني بحس بالفرحه .. احساسي بيبقي حقيقه مش حلم 

هي : ......

أنا : وحلم ازاي اصلا .. مش انت دلوقتي معايا؟؟

هي : ......

أنا : يااااااااااه مش بقولك .. ما بقيتش عارف انا في حلم ولا حقيقه .. حاسس قوي بالفرح وانا بكلمك دلوقتي .. وانت مش معايا!!!

  

حب من غير أمل حكايتي وياك

وأيه العمل؟؟ وعله قلبي هواك

يمكن دوايا في لقاك؟؟

 

يمكن؟؟ .. يمكن ازاي وانا الدقيقتين اللي قابلتك فيهم في الحقيقه لاحسيت باني طاير في السما ولا بنسمه هوا بتداعب خدودي ولا بضي منور طريقي .. بالعكس ببقي خايف وموجوع .. وانا معاك بفهم قوي معني الحرمان !!! .. وانا معاكي بتبقي الدنيا ملكي مش عاوز ضي ينور طريقي لاني مستكفي بوجودي معاكي .. بعرف ان حياتي غيرك هي الحرمان .. حرماني من الفرحه في ابتسامتك والبهجه في ضحكتك والونس في نسمه هوا جايه من ناحيتك متعطره بعطرك .. معاكي ببقي خايف من الوقت اللي هايتقال فيه مع السلامه .. وهي السلامه بتحل عني برضي مني وياك.

 

***


الخميس، 5 فبراير، 2009

ولحين اشعار اخر .. لازلت انسان !!!



2009/2/5 ... !!.. العام الجديد تتاكل ايامه سريعاً .. ولم يفي بوعوده التي قطعتها لنفسي نيابه عنه لثقتي انها اقل من ان يبخل القدر بها عليّ .. لكني لازلت انتظر .. والصبر مفتاح الفرج.
ولحين اشعار اخر ساتشاغل في التفكير .. التفكير في اموري ... بلالم نقطه نقطه نقطه ثم نقطه ومن اول السطر

==========

أشهد أن لا حباً إلا حبك
طب وبعدين؟؟ .. يعني ليه انت ؟؟ وازاي؟؟ .. مجمل الوقت الذي قضيناه سويا لا يحسب الا بالدقائق .. نعم تعدي الثواني - حمداً لله - لكنه لا يزيد عن كثير جدا من "دقائق". لم احادثك الا في هذل .. "أزيك سلامات" .. انتظر هذا اليوم الذي اجي اليك فيه واقولها لك صريحه " .... " ولن اذهب مثل المرات الماضيه لاني ساقول -لا هذلاً- وانما فعلاً 

اه .. قبل ما انسي .. هاشتري هديه الفلانتين واحتفظ بيها  .. فلازلت غير جديرا بان اكون رجلك.

==========

حي علي الفلاح
عملي الحبيب .. بعد طول انتظار .. ولان لاوقت اخر للانتظار .. عذراً ..ساقتل حلمي بك بيدي .. كي لا انعت يوماً الحظ .. سأبحث عن هذا الذي يقولون عنه .. بيجيب فلوس .. وملعون أبو الحلم علي العلم علي الهذيان.

ملحوظه : المخدرات بتجيب فلوس برضه .....

==========

أقرأ..
ثقافتي المنتظره .. انتظري قليلا .. سأتي لا تقلقي .. امور بسيطه اخري انتهي منها ووعد ان ارتمي اليك .. فقط لا تقلقي .. فانا لازلت انتظرها كي انهيها واجئ اليك لتشكليني

وخلي في بالك .. الثقافه مش قرايه كتب وبس  
 
==========

الله محبه
الاهي الذي في السماوات والارض ايضا .. يسكن فضلك نفسي والكون .. صنعتني واحببت صنعك .. فميزتني .. احبك يا ربي بقدر ما تحبني .. ولا املك زياده .. فانت الاعلي في كل شئ.  اعاهدك ان تجدني كما تمنيت .. فانت لا تتخلي عني ولا احيد عن ثقتي في قدرتك 

الاهي احبك وهكذا اعبدك


ليصلك الجديد أشترك بالبريد