الثلاثاء، 27 يناير 2009

علي سلامه .. شبه مصر




كتــــــــــاب القــــــراءه صـ 35 

بمنتهي البراءة 
سألتني بنتي نور 
ف أربع خمس أمور 
مش ف كتاب القراءة  !!!

قالتلي : بابا بابا 
مش إنت .. يا بابا 
بتكتب أغاني .. وتقول أشعار .. ؟!

أنا سمعت ..الشيخ يا بابا ...
بيقول إنك يا بابا …
ها تروح النار ... 

زي الوحشين يا بابا .. الحراميين الكفار ..

قوللي يا بابا 
يعني إيه إستعمار ..
يعني إيه نيل  ..
يعني إيه هرم  ..
ومين اللي حط النسر فوق العلم ..

يعني إيه يا بابا 
إستفتاء ..
و يعني إيه إنتخاب ..
ويعني إيه حر ..
ويعني إيه نصاب ..
يعني إيه إختلاس ..
ويعني إيه هجاص ..
ويعني إيه خصخصة ..

يعني إيه يا بابا 
دستور ..
يعني إيه معارضة ..
ويعني إيه مظاهرة ..
وليه النهاردة خدنا أجازة م المدرسة ..

قوللي يا بابا ....
يعني إيه قهر ..
وأين يقع خط الفقر ..
ويعني إيه حظ ..
ويعني إيه زهر ..

يعني إيه يا بابا ...
يعني إيه إنسان ..
 يعني ايه حريه ..
ويعني إيه سرطان ..

يعني إيه يا بابا ...
خربوها ..
ومين دول يا بابا .. اللي خربوها ..
وكنت فين لما خربوها ..

ومين دي سمارة يا بابا ..
وإزاي يا بابا ضاعت من قلبك ..

يا بابا ..
 إنت معايا ...

فيه يا بابا ناس .. بتقول كفايه ...
وفيه كمان عساكر .. مسكين عصايا ...
وبنات متعورين ...
وتانين …
ماشين بيضحكوا ...
هما دول إسرائليين يا بابا .....
ويعني إيه ...
ويعني إيه ...

قولتلها  : نور ..؟! ... ممكن أسألك سؤال؟؟
قالتلي : اتفضل يابابا ..
 هي قناة "سبيس تون" .. رقم كام ؟؟

وخدتها .. عشان تنام
============





تسجيلات علي سلامه

فيديوهات من برامج وبعض حفلات الكاتب علي سلامه
سيتم عرض 20 فيديو بالتتابع ..  تلقائياً " استخدم الاسهم يمين ويسارالشاشه للتنقل بينهم"




هناك 4 تعليقات:

  1. وأقول ها نفرح..

    ف يوم..ها نفرح

    ويوم مانفرح

    علي الله...يفضل في القلب


    حته

    ردحذف
  2. يخربيت دماغك علي دماغ علي سلامة يا ابو عقل مهوي انت
    يالله
    الا هم مين اللي خربوها صحيح؟؟؟؟؟؟؟؟؟

    ردحذف
  3. السلام عليكم ورحمة الله وبركاته

    الله... حلوه اوي بجد الكلمات دي، جميله اوي فعلا ما شاء الله
    انا تقريبا سمعتها منه قبل كده في التليفزيون ... فعلا كلمات معبره ومؤثره اوي
    وتقريبا شامله كل حاجه :)

    تحياتي :)

    ردحذف
  4. دول مش اربع خمس امور
    دى تقريبا كل الامور
    وهى كبيرة على البنت نور
    ودى أسأله تخلى عقلنا
    (المهوى) يدور

    وبعدين فيك ياعقل يامهوى..
    عماد من ثقافة وابداع

    ردحذف

ليصلك الجديد أشترك بالبريد