الأربعاء، 24 ديسمبر، 2008

سيــــــــــــــــبر



سيبر .. طبعا كلمه مش محتاجه تتعرف لينا خاااااالص بما انك هنا دلوقتي يبقي انت سيبرجي قديم زي حالاتي .. الا اذا ربنا فتح عليك وبيجيلك قلب تدفع "25" جنيه شهريا في وصله النت للسيبر اللي تحت بيتكم .. او ربنا فتح عليك قوي بقي وجبت خط "DSL" لوحده " يابختك" .. بس يا صديقي انت لو عندك خطك لوحدك برضك حتبقي محتاج تنزل تدخنلك حجرين شات علي اقرب كافي نت جنبكم اصلها بقت غوايه .. بالنسبه ليا عل الاقل .. السيبر ليا مش المكان اللي بتنزله عشان تنتت ولا تشيت وبس .. لا دا دنيا .. دنيا حتلاقي فيها من اول العيل اللي قاعد بيلعب من اول النهار وامه بتدور عليه وصاحب السيبر شايفها يا ولداه رايحه جايه ومطنش .. وحتلاقي فيها الشباب الجدع الجميييييل اللي قاعد مديها شات وهاتك يا ودود مع ناس في المجهول  او حتلاقيه "مثقف" وقاعد بيتفرج علي فيلم تسجيلي يمثل عمليه التكاثر في الانسان "نمشيها كده" .. او حتلاقي " أم - زوجه - أبنه " تضحك وتبكي تنادي " ابنها - زوجها - ابيها ان يعود من الغربه .. "احنا عاوزينك انت وملعون ابو القرش ...... ".
===========
1

زوجان مسنان يجلسان الي جهاز الكمبييوتر يحادثان من يفهم بانه ابنهم .. تحدثت الام اولا ضحكت وبكت .. دعت له ودعت علي "اللي يجي عليه" .. نهرته لانه مش شايف صحته .. وفزعت لانه مش حينزل الاجازه الجايه " طب وانا اقول ايه للبت وامها" .. قصت عليه كيف انهم شطبولوا الشقه "سوبر لوكس" بالفلوس اللي بيبعتها وجابت شبكه "حاجه الاجه" .. أخبرته انها تنتظر عودته بفارغ الصبر وانهت الحديث بواصل من البكاء لم يوقفها سوي لكز ابيه لها " يا وليه هاتعكنني علي الواد .. اوعي كده " .. وبدا هو في الحديث معه لم يحدثه بقدر ما وعظه وارشده .. وكانت عظاته وكانها موجهه للام .. بأن يشد حيله وهو لو ما تعبش دلوقتي حيتعب امتي  .. شوف مصلحتك ولو مش حتقدر تنزل خليك انت عارف ظروفك .. ثم دعا له الله بان "يوقفلك ولاد الحلال" .. الغريب انه بعدما انهي حديثه دمعت عينه فمالت السيده عليه وجذبته من ذراعه وانصرفا..

=========

2

سألته :"أنت مش حتنزل بقي؟ .. " .. ثم عادت وسألت " مش ظروفك بقت كويسه هناك .. انت مش حتبعت تاخدني ولا ايه ؟" .. اشتكت له الوحده .. وقصت عليه رحلتها اليوميه من صباح ربنا وكيف تقضي اليوم مع امه في الشقه لحد ما بتطلع تنام .. " ايوه بحس بالوحده .. ما هي امك حتكلم معاها في ايه يعني  هقولها بحبك .. وضحكت " .. ثم  حدثته عن ليالي الشتاء والبرد اللي " بيقرص في جتتها " .. "ايوه عارفه اننا في الصيف بس انا بقولك علي الشتا .. وبعدين ماهي الدنيا بتبرد في الصيف برده " .. طلبت منه ان يوصل الكاميرا وحزنت لانه لا يملك واحده " اصلي عاوزه اشوفك .. اوعي تكون حلقت شنبك .. انت عارف بحبه .. فاكر .. " .. اخبرته ان ابنه خلالها قد انجبت "بنت زي القمر" "عارف اهي البت بنت خالي دي اصغر مني بسنتين .. تخيل!!" .. سالت وحكت وقصت والمحت .. ولهذا لم تشك في انه فهم ما ترمي اليه فصرخت " .. ملعون ابوك لابوا الفلوس افهم بقي .." ثم انتبهت لحالها وانها أصبحت فرجه للناس  .. فانكمشت الي جهازها وبكت وهمهمت ببعض الكلمات اختلطت بنحيبها فلا تفسر منه غير" عوزاك" ..

============

3

هذه السيده تحديدا هي من جعلتني اكتب هذا البوست .. شابه "حلوه " تحدث مع من تحدثه عن هذا الرجل "اللي واخد باله منهم و بيسال عليهم" .. ثم  تذكرت ايام السفر الاولي لكنها تعود وتقول  " والله من يوم ما سفرت وهو يوماتي يسال عنا" .. تنجذب معه في الحديث عن الدنيا وحالها واحوالها وتقول  "  والله لولا وقفته جانبي دايما ما كنت اعرف اعمل ايه في الدنيا دي وانت سايبني لوحدي انا والعيال " .. وتحكي له عن العيال ومصائبهم وطلباتهم اللي ما بتخلص .. " اه صحيح نسيت اقلك .. دا كل ما يشوف عيل من العيال في الشارع حكما يجيبله اشي شئ وشويات دا غير الفلوس اللي بيدهالهم "  .. تتذكر الفلوس والحاجه اللي "باقت ولعه " .. " ونبي عرض عليا كذا مره يبقي يساعدني في مجايب الحاجه من السوق بس اني اللي قلتله لا .. ما هو الناس تقول ايه برضه" .. اشتكت له من الناس وآلسنه الناس وغمزهم ولمزهم وانهم يتحدثون عن هذا الغريب بما يسئ لهم لكنها ابدا لا تنصت لهم لانه زي اخوه برضه وبيراعي بيت اخوه " مش كده برضه ولا انت شايف ايه ؟! .... "





هناك 16 تعليقًا:

  1. انت ياللى بتضحك على الناس وتقول عقلك مهوى
    ماهو ماينفعش عقل مهوى يقول الكلام الحلو دة
    انزل ولف واسمع من الناس وارجع اكتبلنا حواديت جميله من عقل مهوى بس مش مهوى
    ومن قلب مليان احساس وانا متاكدة انه مش مهوى

    ردحذف
  2. والله يامها انا قلتله الكلام ده كتير قبل كدة
    قلتله مين ضحك عليك وقالك ان عقلك مهوي
    يالهويييييييي
    يالهوي عليك يامحمد
    ايه يابني الجمال ده
    ايه الاحساس ده
    يخربيت دماغك المهوي
    اهو انا اموت بقي وابقي مهوي بس مهوي بالشكل ده
    والله يابني ضحكتني وعيطتني في نفس الوقت
    عجبتني قوي حكاية المثقف اللي بيتفرج علي فيلم تكاثر البشر ده هههههههههههههههههههههه
    ولا الام والاب اللي بيكلموا ابنهم
    ولا الحدوتة اللي عمالة تلف وتدور علي جوزها ومش واخدة بالها انها قاعدة في سايبر
    ههههههههههههههههههههههههههههههههه
    فعلا لو كل واحد منهم كتب مشاعره واللي حاسس بيه ماكانش هايبقي اجمل ولا اروح ولا احساسه صادق زي ما انت كاتبه ومعبر عنه كدة
    بجد بجد
    منك لله ياشيخ روح

    ردحذف
  3. يا خربيت احساسك ما شاء الله عليك
    بص يا محمد انت لازم تسمع الكلام
    مفيش عقل مهوي دا انت ما شاء الله علي دماغك
    او لو انت مصمم انه مهوي فادعلنا عقولنا تبقي مهويه زيك
    وبجد انت مش عارف انا قد ايه بستني كلامك عشان اقراه
    واستمتع بيه
    ما شاء الله عليك

    ردحذف
  4. بالذمة يعني دي كتابات عقل مهوي؟؟

    امال لو مش مهوي كنت كتبت ازاي

    أنا اشكر الصدف السعيدة التي عرفتني على هذه المدونة الجميلة واشكرك كثيرا لمرورك بمدونتي واضافتك لها عندك

    تحياتي

    ردحذف
  5. صباحو سيبرات

    ^_^

    بس انا كده فهمت يعنى ايه "عقل مهوى "

    ردحذف
  6. شكرا على مرورك في مدونتي

    ردحذف
  7. بجد اللى عاجبنى فى مدونتك.. ان مفيش مها اتنين

    مختلفة وغريبة وانا بحب الاختلاف

    ردحذف
  8. بجد نو كومننت
    البوست هايلة جدا والاحساس والصدق فيها عاليين اوي في وصف كل حالة يا استاذ\ محمد
    --------------------
    بعدين فيها ايه اما يكون الراجل داخل طالع عليها هي وعيالها ... جايبلهم كل حاجتهم وملبيلهم جميع طلباتهم .. واكل شارب ومش بعيد مبيت كمان .. اييه ؟؟ مش زي اخووووه ؟؟ :d:d

    -----------------
    وكمان رأيي من رأي كل اللي سبقوني
    لو انت عقل مهوي .. يبقي عقبالنا كلنا :)

    ردحذف
  9. هعلق على الجزء الاخير عشان هو اللى اثار تفكيرى اكتر واحد منهم يعنى اكيد كتير منهم شكك فى نوايا الراجل انا منهم لكن بدعى ربنا انه يكون كويس و مش قصدة حاجه احنا اكيد مش بحاجه الى صدمه جديدة فى اخلاق الناس اللى احنا مصدومين فيها اصلا تمارس دور الحاكى دور لذيذ بتقتطع مقاطع من الحياة العابرة لناس فيها من الكلام ما فيها مواقف بالف كلمه طبعا حب الاب و الام لا خلاف عليه مقاله ممتازة

    ردحذف
  10. اييييه دا بجد تنفع تكتب رواية كاملة اسمها سيبر واحداثها بتدور في سيبر .. بجد روووووووعة صعبت عليا أوي تاني واحدة اكتر واحدة صعبت عليا بصراحة

    وبجد عجباني مدونتك اوووووووووى وعاجبني الديسكريبشن

    ردحذف
  11. كل حاجة هنا حلوة من اول شكل المدونة مرورا بالاسم وصولا للبوست التحفة دة..........الله ينور بجد

    ردحذف
  12. السلام عليكم
    دي اول مرة ادخل مدونتك
    بجد روعة
    و الموضوع ده مش معقووووول
    بجد حسيت بكل حرف فيه
    اصلي تقريبا بشوف المشكلة دي كل يوم قدامى
    و مش عارفالها حل..............
    هبة الله

    ردحذف
  13. مش عارفة أقول ولا كلمة
    كل اللي اقدر أقوله
    ان ممكن " يوسف ادريس " يكون معانا تاني بس في 2009
    لو عايزين تاخدوا فكرة عن أسلوب يوسف ادريس
    وبالذات في روايته " أرخص ليالي " ممكن تقروا ده الاول
    انت عارف انا بحب يوسف ادريس قد ايه
    واكيد مش هقول كده من فراغ
    لما تكون قادر تقلب جوه النفس البشرية كده .. يبقي قربت اوي

    ردحذف
  14. ايه ياعم المدنه الجامده دى هتقطع كل المدونات الغلبانه زى المدونه بتاعتى اللى مفياهش ولا نفر
    ويمكن تكون انت اول واحد ..وكمان فيها صورة لك ودى النك
    emadhelal.bogspot.com

    ردحذف
  15. اصبح السايبر مكانا لمعرفةاحوال الناس
    قديما كانت المقهي كنز الافكار للكاتب الان اصبح المقهي
    اسلوبك حلو قوي
    وعقلك مش ممكن يكون مهوي

    ردحذف
  16. اقصد المقهي الالكتروني السايبر

    ردحذف

ليصلك الجديد أشترك بالبريد