الخميس، 18 ديسمبر 2008

عقد رباط الجزمه !!


كنت المفروض أني أكتب الآن موضوع  أخر شخصي  عن تاثير الوطيـنه المستوطنه في عقل الفقير الي الله .. بس كان تعليق "منامينو" علي البوست الماضي "أهم الأنبـــــــاء"  خرجني من لحظه التامل وما قدرتش اوطين واكنسل تعليقه. وبرغم أني متفق تماما مع رأيه وان اختلف الاسلوب ألا أن شئ ناداني وقالي يا واد ما تشوفه .. وحصل ويا منامينوا انت بتقول ايه ؟؟ .. رد عليا و .. 

قال بالنص " ...... اي فعل بيحصل نتيجة انفعال مابتبقاش محمودة عواقبه.. هو كسب ايه .. ولا احنا كسبنا ايه .. هو هايـ"تييييييت"  ده لو سابوه يعيش لما يـ"تييييييت" ..  واحنا فضلنا نهلله ..  بس كسبنا ايه  العراق زي ماهي وامريكا بـ"تيييييت"ــنا كل يوم قبل الاكل وبعده

تظاهرات ضد مين ولصالح مين؟؟ ..  بعد ماكنا بنتظاهر علشان العراق والاحتلال .. دخلنا نفسنا في مواقف فرعية وبقينا بنتظاهر علشان المنتظر .. شتتنا نفسنا  وشتتنا قوتنا

يعني اللي عمله منتظر ده كل اللي عمله انه هدي الناس ضد بوش وسياسته !! ..  وكأن بوش كدة بقي خلاص خد جزاءه  و فعلا ناس كتير ومنهم ناس كبار ومهمين والمفروض انهم بيقودوا فكر الناس فاهمين كدة وكتبوا مقالاا كأن منتظر حرر العراق وفلسطين ونزلت الاشعار ترف علي جزمة المنتظر لا والانكت الجزمة بقت بتتباع بالملايين  .. اي حد عاقل لما يسمع اني بادفع ملايين في جزمة انضرب بيها عدوي  في الوقت اللي تلات ارباع شعبي مش لاقيين ياكلوا  .. تفتكر هايقول ايه غير انه راجل معقد؟؟ .. بوش ده مسببله عقده نفسية في حياته بوش ده بيديله بالجزمة كل يوم  وماصدق يلاقي حاجة يطلع فيها غله .....

الفكرة في الهليلة اللي عاملينها احنا والناس اللي عملت منه بطل ..  لما عبده ابن قريبك "عقل عيال"  يسمعك وانت عمال تمجد في منتظر ده ويسألك هو عمل ايه علشان انت فرحان بيه قوي كدة .. هاتقوله ضرب بوش بالجزمة .. وضربه ليه .. هاتقوله اصل بوش ده وحش ..  لو انت جيت في مرة تزورهم من غير ماتجيب معاك شوكولاتة هاتبقي في نظره وحش وهاتبقي تستحق اللي اتعمل في بوش لانك وحش وانت اللي علمته كدة ان الوحش بينضرب بالجزمة تخيل بقي لما جيل كامل يطلع فاهم ان الوحش بينضرب بالجزمة والوحش ده انا اللي باقرر انه وحش بيني وبين نفسي .. وساعتها الشباشب ام صوباع هايبقي الواحد منها بكام  ويابخت الصين ساعتها هانستورد منها شباشب بالهبللللللللل"


دي كانت محادثه بيني وبينه ..  ما كانش ينفع اني اكتب الكلام بتاعي  .. لاني تقريبا ما اتكلمتش وقلت جمله مفيده  .. كنت بسمع لرأيه وبغض النظر عن اتفاقي او اختلافي معه بس الاكيد اني بحترم هذا الصديق  .. اللي بعتقد ان لو احد الكتاب الكبار فكر ولو يعقد رباط جزمته قبل ما يجري في سباق التهليل او التنكيل .. كان حيصل لما وصل له صديقي الشاب منامينو .. طبعا بما يستحق ان يكتبوا فيه وعنه.. ولهذا آثرت ان انشر رايه في بوست منفصل بعيدا عن التعليقات .


تحديث: كتب منامينو رأيه باسلوبه الشيق في مدونته مش اسف علي الازعاج  .. فلزم التنبيه  .. واتفضلوا اقروا كلامه باسلوبه اشيق واستمتعوا



هناك 3 تعليقات:

  1. مش هاينفع اعلق علي كلامي
    حبيت بس اقولك شكرا

    ردحذف
  2. براحه من كتر ماالكلام جميل مش لاقيه تعليق

    ردحذف
  3. اه والله بجد انتوا تجننوا
    ما شاء الله عليكوا

    ردحذف

ليصلك الجديد أشترك بالبريد