الثلاثاء، 16 ديسمبر 2008

أهم الأنبــــــــــــــاء

أهم الأنبــــــــــــاء " صوت مارشات عسكريه "

تم مساء امس الاول هجوم بصاروخين موجهين على رئيس الولايات المتحدة جورج بوش فيما رجح الخبراء انه من طراز ابو رباط الموجهه و اختلفو على قدراته النوويه .. حيث صرح البعض انه له قدرة اشعاعيه مذهله قادرة على الفتك بعشرة اشخاص فى الثانيه و قال البعض انه كان يحمل عاز الاعصاب المعروف بسميته الشديدة المتعارف عليه اصطلاحا رائحه الرجلين فيما اكد فريق محايد من الخبراء ان الحذاء كان يحمل النوعين السلاح الكيماوى (( رائحه الرجلين )) و السلاح النووى (( الشراب المخصب)) و قد استدلو بهذا على تاخر رد فعل الحرس الشخصى للرئيسين بسبب الاشعاع فيما يجرى الان معالجه الرئيسان من اثار الاشعاع .. و قد قال المقربون من البطل الذى قام بالعمليه بانه كان يستعد لها منذ ما يزيد عن العام حيث لم يخلع الحذاء طوال هذة المدة ممارسا كافه الانشطه به الان ننتقل مع مراسلنا من القاهرة من قلب مقر جمعيه شباشب بلا حدود مع رئيسه الجمعيه السيدة الفاضله ام عبدة الحائزة على الجائزة الاولى فى رمى الشبشب لمسافه 150 متر و صاحبه الرقم القياسى فى عدد الاصابات المباشرة المتلاحقه (( يعنى مبتجليش من الاخر )) بسؤالها عن مصدر السلاح الخطير اوضحت ان السلاح قد صنع بدقه مذهله رغم الضروف ووالامكانيات البدائيه فيما عابت على سوء التدريب لفشله فى اصابه الهدف مع قيامه بالتصويب من مسافه قريبه للغايه لا تتجاوز العشرة امتار موضحه ان الهواة من اعضاء الجمعيه (( مثل الامهات الجدد)) كانو سيحققوا اصابه ناجحه للرئيسين بدون الحاجه للوقوف مثلما فعل منفذ العمليه حتى مع الطراز البدائى ابو اصبع المتعارف عليه محليا زنوبه و قد اعلنت قيام الجمعيه بافتتاح فرع لها فى بغداد تدعيما و ايماننا منها باكتشاف القدرات الجديدة فى كل مكان

كان معكم من امام باتا مراسلكم
مازن محمد احمد

هههههههه .. خبطنا صديقي مازن " معرفوش لو فيه مشاكل " بموجز الانباء اللي نقلناه حصريا علي قناتنا " عقل مهوي مش حتقدر تشم ابداً" .. علي فكره مازن وأنا واصدقائنا وحبايبنا وجيران الجيران كلنا تقريبا في سن
منتصر الذيدي "29 سنه" !!! ...

طبعا علامات التعجب دي مش في مكانها .. لان لما حقول الذيدي محدش حيستغرب ويسال " الذيدي مين " لان ما فيش حد اصلا ما سمعش وما شفش وما قراش وما اتنفس عن هذا "المنتصر" .. مراسل
قناه البغداديه اللي في اقل من ثواني اصبح العالم كله يتناقل اسمه .. واتشالت الاخبار من شرايط الاخبار واتحط بدالها خبر فعل الذيدي .. وبرغم ان فعل الذيدي لن يؤثر الا بالسلب عليه هو شخصيا .. لكن منتصر انتصر لنا احنا كشباب واثبت للي بالي بالك اننا مليئون بطاقه ستدفعنا لارتكاب ولو حماقات .. ولكن حماقات علي رؤسهم ورؤس اللd يتشددلهم كمان.

وبالطبع .....
طبيعي أن يخرج علينا بيان من المركز الوطني للاعلام التابع لمجلس الوزراء العراقي يصف فعل المنتصر بالقول"منتسب احد الفضائيات قام بتصرف همجي مشين لا يمت الى الصحافة بصلة اثناء المؤتمر الصحافي لرئيس الوزراء نوري كامل المالكي والرئيس الاميركي جورج بوش وذلك بأن حاول الاعتداء على الرئيس الضيف".

ماهو حيقولوا ايه وهما الاعلام الوطني الناطق باسم "اسم الله عليهم" الحكومه "العراقيه طبعا" .. فلا بيانهم غريب ولا مواقف البعض ممن لهم "شنه ورنه " في الاعلام العراقي كروئساء النقابات والصحف وبعض المحطات.

المهم ما قاله الشارع .. العرب فرحانين .. بغض النظر عن ان الموقف حلو لا مش حلو .. بطولي لا مش بطولي بعرضي "دمي خفيف :) " .. خروج الشارع في تظاهرات رافعين الاحذيه يطالبون بالافراج عن المنتصر والبحث عن تحديد المصير المرتقب وسؤال ذووي الخبره من المحامين اللذين اعلنوا تضامنهم واستعدادهم للترافع .. وموقف بعض المحطات المؤيد او المساند لحريه الذيدي. موقف الشارع مهم .. او هو الاهم .. لكن لاني عقلي مهوي ومخي تلفان فانا سيبتني من التائيد والكلام الجميل ده وبصيت بطرف عيني لبعد بكره .. ياترا بعد بكره المناشتات وشرايط الاخبار حتنقلنا ايه .. بيتهيالي ان الاخبار حتبقي زي كده "تواصل المسيرات المطالبه بالحريه لقاذف الأحذيه " .. " ارتفاع ملحوظ في اثمان الاحذيه مقاس عشره " " شعبان عبد الرحيم يفوز بجائزه الميوزيك وورد بعد نجاح اغنيه عن الذايدي" .. " تزايد الطلب علي بوسترات منتصر الزايدي " .. " الحكومات تواجه الازمه المفتعله لانخفاض انتاجيات القطن لسد الحاجه من انتاج التي شيرات " .. وأخيرا .. الرئيس المنتخب أوباما يحتفل بالعام الجديد من البيت الابيض"


تحديث: بعد كتابه الكلام ونشره .. اكتشفت ان المنتصر اسمه المنتظر .. فلزم التنويه. ولزم القول ايضا انها بشره خير .. فمنتظر منتصر وأننا ننتظر

تحديث " الاربعاء : 17/12/08" : تعقيبا علي أفتتاحيه الاستاذ أبراهيم عيسي للعد الاسبوعي لجريده الدستور .. اعتقد اني اتفق معه -دون الوصف بانه مشين - ولكن اود ان اعيد القول بان ما فعله منتظر ليس بالفعل الجلل البطولي -ان لم يكن مخزي - لكنه يلفت النظر ان الشباب العربي فاض به الكيل "وطفح" وقد يؤدي هذا الي ارتكاب حماقات .. فعلي الاستاذ ابراهيم وزملائه الالتفات والانتباه الينا كبركان نشط.

=====================================

هناك 4 تعليقات:

  1. اولا يخرب عقلك اللى لسه مش مهوى اوى يامازن
    انا ضحكت بصوت عالى اصلا من جمعية شباشب بلا حدود دى :)هههههههههههههههههه

    ثانيا يسلم عقلك المهوى يامحمد عشان اولا عشان جبت البوست ده هنا وبجد"شابوه"ليك عشان فيه ناس تانية تقوللك وانا اجيب كلام حد تانى واصيته ليه يعنى مهما كان صاحبى ؟... وناس تالتة تلهف وتحط فى المدونات باسمها ولا من شاف ولا من درى ... ثانيا بتاعة ثانيا تعليقك تحفة بجد مايجيش غير من عقل مهوى .. مهوى مهوى يعنى مش اى كلام:)ههههههههههههه

    ردحذف
  2. ههههههههههههههههه
    لا بجد والله عصابه
    بجد تسلم تهويه عقلك يامحمد لانك حطيت نشرة اخبار مازن هنا
    بجد ملكوش حل
    مش عارفه اعلق على كلام مازن ولا كلامك
    مانتوا الاتنين مصايب
    بجد منك لله يامحمد

    ردحذف
  3. بص بقي ياسيدي يا ابو عقل هسهس ههههههههههههههههههههههه
    اولا اسلوبك في البوست ده تحفةةةةةة
    بجد هايل
    ونشرة الاخبار كمان تجنن
    ولو اني مش مع الهيصة اللي اتعملت علشان الجزمة يعني
    هو بوش جزمة اه ومايستاهلش الا كدة
    بس الجزمة دي عملتلنا ايه
    عارف الفعل بياخد قيمته من الموجه اليه
    يعني لما اشتم سواق ميكروباص هاتبقي حاجة عادية ماحدش هاياخد باله منها
    انما لما اشتم وزير ولا رئيس جمهورية هايبقي حدث مهم وجامد والناس كلها هاتتكلم عنه
    اللي قصدي اقاوله ان الحدث يبقي جلل قوي لما يكون موجه لحد كبير وجامد
    بس بوش مايستاهلش
    واحد ضرب كلب بالجزمة دي فيها ايه
    هو كلب وكلنا عارفين انه كلب
    يبقي لما حد يضربه بالجزمة بيتهيألي انها حاجة عادية
    ماتستاهلش كل القلق اللي اتعمل عليها ده
    ده اولا
    ثانيا لما يبقي عندنا في بلدنا كلب متوحش وسعران
    وكل يوم ينهش تلاتة اربعة من سكان البلد
    نقوم نحدفه بطوبة ونقعد نهلل ونقول ضربنا الكلب بطوبة ؟
    الطوبة دي عملتله ايه يعني
    برضو اللي اقصده
    ان امريكا وبوش بيدونا كل يوم بصواريخ اشي اباتشي واشي طيارات معرفش ايه
    يبقي لما نضربه بالجزمة نهلل قوي كدة
    نروح نشوف حاجة نعملها توقف اللي بيتعمل فينا
    ولا ايه ياجدع
    بس برضو اسلوب البوست تحفة وحلو قوي
    وتقبل اختلافي

    ردحذف
  4. بص يا منامينو انا معاك في انه فعلا احنا مسفدناش حاجه
    بس انت عارف لما يكون في كبت كبير اوي عند كل الناس
    فاي حاه هايفه بتحصل في الحد اللي مسبب الكبت بتيقي جامده حتي لو كانت حاجه مالهاش لازمه
    وبجد طبعا انت عارف يا مازنجر انا معجبه قد ايه بالبوست وكمان ميرسي كتييييييييييير يا محمد علي نقله والتعليق

    ردحذف

ليصلك الجديد أشترك بالبريد