الاثنين، 24 نوفمبر 2008

عقل عيال بصحيح ؟!


عملاً بالقول الحكيم " خدوا فالكم من عيالكم " وهو قول ما اعرفلوش صاحب بس عاجبني وقلت اجرب, ولاني ليس لي عيال واعتقد انه ليس في القريب ايضا لعدم وجود ام العيال ذاتها فقد قررت ان اخد فاللي وباللي  من عيال العيال اصحابي.


 اول ما لفت انتباهي واخد هو بباللي ان براءه العيال دي بتسمحلهم بأسئله ليست من البراءه في شئ – العيل بيسأل كل سؤال والتاني تقولش قاصد ولا مؤخذه يمرمط سعادتنا حرجا وخجلا – خد عندك ياعم ولاقي واد في سنه 3 ابتدائي –شهاده يعني – يفاجيني وابوه اللي بيهزر معايا وما حبكش لمعاليه يقول غير" يا اخي خاف ربنا" ويقهقه وياعيني ما لحقش يخلص قهقهته ونلاقي الواد يبادر بالسؤال : هو احنا ليه بنخاف من ربنا؟

والسبب في السؤال ان المربيه الفاضله في الفصل تقول ان اللي مش حيخاف ربنا حيدخل النار!!! ..  كنت اتمني ان تقول  لهم اللي بيحب ربنا بيدخل الجنه ساعتها كانت حتريح دماغنا وتشيل الحرج عنا قدام حته العيل اللي ما عرفناش نجاوب عليه بغير "روح اللعب يا حماده".

ثاني ما يلفت الانتباه هو انتباههم الشديد وقوه ملاحظتهم -اللي امتلكناها صغارا ونفتقدها الان-. قاعد مع واحد صاحبي وكان يوم مولد النبي تقريبا التليفزيون شغال وانا وهو بنلعب وكش ملك نلاقيلك الملك الصغير يفوق وينغز اخوه –المره دي اخوه مش ابوه – ويقوله : هما الكفار كانوا مسلمين يا ابيه؟؟؟ مش عارف ليه ابيه ناوله علي صرصور ودنه بكف ايده –كان يعرف الكفار؟؟؟؟؟ – طبعا وسط عياط من الواد وزعيق من اخو الواد واستفسار من ابو الواد وطبطبه من ام الواد علي الواد انا كنت سرحان في سؤال الواد. لكن يبدوا ان خوفي من ايد صاحبي الطارشه خلاني اقعد ساكت – لاحظ اني قلت خوفي من ايده مش منه – وفي هذا الموقف كان يجب علي ان اتنحنح –من النحنحه- واتلحلح – من اللحلحه- وانصرف . ولكن مستني حد يجاوب علي السؤال.

وبصراحه وبدون عمل حساب للايادي الطارشه. صغيراً كنت بتلخبط دايما اثناء متابعتي للافلام الاسلاميه – ان جاز التعبير- وسبب  اللخبطه ان الكفار كانوا مربين دقونهم وبيتكلموا عربي بالفصحين . وبالفصحي كده هما الكفار كانوا مسلمين؟؟ ولا الدقون كانت موضه ايامها؟؟؟؟؟ 

ثالثا ويمكن دي تكون نصيحه اكتر منها ملاحظه في ملحوظه .. "ابتعد تماما ونهائيا عن تعليم ابناءك القيم؟!"  .. وماتستغرب  .. دي نصيحه من دهب بس انت مش واخد بالك

وخد بالك .. حضرتك تقعد تعلم الواد ولا البت وتغرز فيهم قيم وتحثهم علي الشهامه والمروه والجدعنه والواد يامعلم ياخد فيك أحلي مقلب ومع أول موقف .. وهوووووووووب يتصدم الولا في حقيقه الشهامه والمروه .. يارب ما تتصدمش انت من كلامي وتسمع اللي حصل  .. مره من ذات المرات وكنت راجع متأخر في الليل والدنيا برد ورايح الموقف مستني مواصله الاقيلك الناس امم وما فيش مواصلات!!!! 

- فيه ايه يا جماعه ؟؟

-البنزين غلي ومافيش مواصلات منهم لله - طبعا السواقين هما اللي منهم لله "D: " ..

 الناس ياخلق هوووووه امم واقفه وكل فييييييييييين وفييييييييين لما تيجي عربيه والاجره غلت ياحضرات .. ..  والناس علي امرها مغلوبه يعني يباتوا في الشارع.

المهم فضلنا كده لحد ما صفصفت علي مجموعه بسيطه من الناس وكان فيه قول بتاع اربع خمس بنات " والبنات في بلدنا ظابطه الساعات بس اليوم .. يوم استثنائي "

تيجي عربيه ولاقيلك واحد هجم كالسبع علي باب "الزرفيز" ولامؤخذه ولافح ابنه علي كتفه ووسط تدافع من الواقفين علي الزرفيز ولامؤخذه أسمع الواد الصغير الملفوح علي كتف ابوه بيقول: "يابابا فيه بنات واقفه حنركب ازاي ونسيبهم واقفين ماينفعش" !!

أنا اتسمرت مكاني من قول العيل الصغير وبصيت ورايا الاقي البنات فعلا واقفين مش قادرين يدخلوا وسط الحرب اللي حاصله دي وماحدش سائل فيهم .. بنات حيقفوا وحدهم في الشارع في منتصف الليل وما فيش مواصلات وياعاااااااااااالم ؟!!!

تفتكر كام مره اب علم ابنه امور الجنتله وكام مره قدام ابنه كسر كل قواعد المروه والجدعنه؟؟؟

المهم اني ما لحقت السرفيس .. تخيل؟!!!

بس كل العيال كوم والواد"عبده"  أبن قريبي كوم لوحده .. لي قريب صديق صدوق وواد علي خلق وزوجته سيده فاضله منقبه ولا تخرج الي الشارع ولا يسمع لها حس ولهم ابن "عسل عسل يعني" اسمه عبده...

مره كنت بزوره فبيفرجني علي صور ناس قرايبنا لقيها ونلاقي صوره لابع سيدات اول الظن افتركتهم فاتن حمامه وماجده وزميلات لهن 

-ضحك وقالي لا ياعم دي تبقي حماتي الله يرحمها والتلاته اللي معاها دول فلانه وفلانه وفلانه  أيام زمان كانت خلاعه ياعمنا 

ودا تعقيبا علي لبسهم دا غير انهم متصورين أعوذ بالله

عبده نط مش عارف منين ويقول تعرف ياعمو تيته كانت مدرسه ..  اه والله ..  بابا بيقول انها كانت مربيه فاضله .. بس انا مش عارف ماما ليه ما طلعتش مربيه فاضله زي تيته؟؟

والسؤال لعبده اللي انضرب ضربا مبرحا لم استحمله فمشيت




هناك 5 تعليقات:

  1. طيب هى المشكله فى الجيل لقديم ولا الجديد
    ولا فينا
    ولا فى الجيل اللى بعدنا
    هو فى خلل
    بس محدش قادر يحدد موجود فين

    ردحذف
  2. عارف في قصه شهير عن الطفل الذي اكتشف عري الملك - حابقي احط لك لينك المقاله اللي كتبت فيها الموضوع ده - فعلا الاطفال يروا مالا نراه او مالا نرغب في اي نره - تحياتي لقطات ذكيه

    ردحذف
  3. ولا زال السؤال قائم
    هي ماما ليه ماطلعتش مربية فاضلة زي تيتا
    ياتري العيب في مين
    الحدق يفهم .......
    تحياتي

    ردحذف
  4. مقال رائع بيجمع لقطات بسيطه فيها من العبر ما فيها بحب افكر انهم بيكونو على سجيتهم و فطرتهم قبل ما تفسدهم الدنيا بقبحها و سوادها قوة ملاحظتهم نابعه من انهم بيحبو يتعلمو عايزين يعرفو مش زى اغلب الكبار خلاص عاملين انهم عارفين كل حاجه

    موقف من موقف الاطفال انا و طفل اسمه عبد الله بنتفرج على التلفزيون كنت جايب اقرا كان الاذان شغال و كان الصورة على البيت العتيق قالى دة الكعبه انا بابا كا راح يصلى هناك (( يقصد الحج يعنى )) انا بقى قلت افحمه طيب انت عارف ليه الناس بتصلى يا عبد الله سكت ثانيه و قال ايوة انا رخم قلت ليه قالى عشان ربنا يحبنا

    ازاى نخاف لو ربنا بيحبنا ازاى هيدخلنا النار و هو بيحبنا هو دة الاصل فى العبادة و الطاعه و الايمان الحب عشان ربنا يحبنا

    ردحذف
  5. الأطفال متلوثوش زينا ...

    ردحذف

ليصلك الجديد أشترك بالبريد