الاثنين، 3 نوفمبر، 2008

الحياه 6 في 9 ....

مش عارف ايه اللي خلي سي الوحي يهبط عليا في ساعه صفا مع النفس ويدرش معايا في كلمتين. وخلال الكلام وبلؤم كده يوحيلي بفكره -مش وقتها خالص- بس حلوه ولازم تتنفذ بسرعه. وقد كان...
بسلمته اوحالي باني اجمعني في صوره!! .. 
اصل البني ادم منينا ايه غير شويه صور بتلم ذكرياته ومشاعره واحاسيسه .." صوره اتصورتها زمان وبتحبها قوي -اصل ساعتها قابلت فلان مثلا.- .. وصوره تلاقيك بدور عليها عاوز تلاقيها عشان تقطعها - طب ماهي ضايعه سيبها بقي- لأ لازم اقطعها اصلها بتفكرني بالــ .... 

وغير كده وكده تلاقي صور تانيه مش صورنا بس بتحسها تشوف الصوره تلاقيك جواها !!!؟
صوره يمكن ماتعرفش اتصورت امتي ولا فين كل اللتي يهمك انها قربت ومالت علي احساس جواك فبقت من ذكرياتك

الصوره ماضي بنلجئ لها في الحاضر وها نلجئ لها في المستقبل لاننا بنحن للماضي .. وعشان كده انا سمعت كلام سي الوحي -منه لله - وقمت لفيت أبص و"ابحلق" في كل الصور اللي عندي .. يوم كامل 
يوم كامل بتفرج بس علي صور - اسف - يوم كامل بقرأ ماضي يمكن صغير بس اديني لقيت فيه اللي اقراه.

أضغط علي الصوره " براحه" عشان تشوفها كامله

فكره كمان اني احط الصور في صوره . صوره واحده اجمعها وانساها بس بعد كام سنه ممكن القاها ولما اقراها افتكر انا بحب ايه؟ بسمع مين؟ ايه اثر فيا؟ ومين؟
جمعت الصوره دي .. صحيح ما فيش فيها ولا صوره تخصني بس لما شفتهم اصبحم هما انا .. ما بقوش صوره  9x6 لا بقوا ..انا

هناك 5 تعليقات:

  1. الحياه البوم صور كبير
    فيه هتلاقى صور ورق وفيه صور محفورة جواك من غير مايكون لاصحبها صور
    وصور تانيه ترسمها انت بخيالك وتعشها وتحفظها فى صندوقك لحد ماتتحول لصور من ورق
    واصدق الصور
    صوره رسمها قلبك لملامح انسان لسه مشفتوش
    لمجرد احساسك بيه رسمت صورة لروحه وبعديها اتشكلت فى عنيك ملامحه

    ردحذف
  2. اما فكره حلوه قوي ... انك تجمع صور صغيره وتعمل بيها صوره كبيره - ساعتها لا الصور الصغير بتفضل صغيره ولا الصوره الكبيره بتبقي مجرد صوره ... انت بتجمع تفاصيل تغزل بيها خيوط وفي الاخر تطلع صوره تانيه تابلوه جميل جماله انه مليان تفاصيل مليان احاسيس .... فكره جميله والبلوج جميل يامحمد وانا ضفته عندي علشان نبقي دايما حاسين ببعض وفاهمين بعض وفي الهوا سوا ... مبروك عليك - اميره

    ردحذف
  3. معاك حق والله
    حلوة قوي الفكرة
    ساعات الواحد فعلا بيكون محتاج يرجع زمان علشان يشوف هو بقي فين دلوقتي
    والصورة لحظة وقف فيها الزمن وبيفضل واقف عليطول
    بس انا من يوم اللي حصل ماباقتش ارجع للصور وحتي ماعدتش باحب اتصور كتير
    وماتسألنيش ايه اللي حصل علشان مش هاقولك
    هههههههههههههههه
    تحياتي

    ردحذف
  4. تحفة الموضوع رائع ولمسنى بشكل خاص جدا
    لان الصور عندى مش بس صور لا دى احداث ومواقف
    وحياة كاملة
    انا بعترف انى مجنونة تصوير
    وكل لقطة بحب اسجلها بحس ان ده تخليد للحظة اللى ممكن تروح ومترجعش تانى
    اهو يبقى فضل منها حاجة نبص عليها وتفكرنا بيها
    هايل بجد
    تسلم دماغك
    نجلاء

    ردحذف
  5. ميرسي كتير لعمو الوحي بتاعك
    وربنا يسامحه لانه فكرني بحاجا وزكريت مش عاوزه افتكرها
    بس فعلا انا بعمل كده انا كل حاجه بصورها
    وساعات بتكون في حاجات مالهاش لازمه ليا
    ولا تخصني بس بصورها عشان بتفكرني بموقف او مكان كده يعني
    المهم عقل ايه اللي مهوي بقه انت بتضحك علينا
    ما شاء الله علي دماغك
    وابقي سلملي كتييير علي عمو الوحي

    ردحذف

ليصلك الجديد أشترك بالبريد